Kenya: Abigaragambya batwitse inteko ishinga amategeko

Kuri uyu wa kabiri, urubyiruko rwigaragambya muri Kenya rwinjiye mu nteko ishinga amategeko ya Kenya mu murwa mukuru, Nairobi, nyuma yo kurusha umurindi abapolisi. Amashusho ya televiziyo yagaragaje umwotsi mwinshi hafi y’iyi ngoro, n’urusaku rw’amasasu mu gihe abapolisi bageragezaga gusubiza inyuma abigaragambya.

Amashusho y’imyigaragambyo

Amashusho yashyizwe ku mbuga nkoranyambaga yerekanye urubyiruko rurimo gushwanyaguza ibintu mu biro by’umutwe wa Sena muri iyi nteko ishinga amategeko. Ikinyamakuru CNN kiravuga ko nibura umuntu umwe yarashwe agapfa, abandi bagakomereka ku ngoro y’inteko ishinga amategeko.

Imyigaragambyo mu mijyi ikomeye

Urubyiruko ibihumbi rwari mu mihanda y’umurwa mukuru Nairobi no mu yindi mijyi ikomeye nka Nakuru, Kisumu na Mombasa, rushinja ubutegetsi bwa William Ruto gushaka kuzamura imisoro mu mushinga w’itegeko mushya. Ikinyamakuru Daily National cyo muri Kenya kivuga ko iyi myigaragambyo irimo kuba mu ntara 30 kuri 47 zigize Kenya.

Gukaza umutekano n’ingaruka ku bucuruzi

Mu gitondo uyu mushinga w’itegeko wemejwe ku cyiciro cya kabiri n’inteko ishinga amategeko mu gihe cy’amasaha abiri gusa, mu gihe hanze y’ingoro y’inteko imyigaragambyo yari irimo guca ibintu. Polisi yakomeje kurasa ibyuka biryana mu maso ku bigaragambya kugira ngo ibatatanye no kubabuza kwinjira mu nteko ishinga amategeko.

Ubucuruzi mu murwa mukuru bwafunze, no gutwara abantu bikaba byari bicumbagira mu gihe abigaragambya bamaze kuba benshi cyane hagati muri Nairobi.

Impamvu y’imyigaragambyo

Leta ivuga ko ikeneye imisoro mishya kugira ngo ibashe kwishyura ibyo ikenera no kwishyura imyenda ifitiye abayiguriza. Urubyiruko rwiganjemo abo mu kiragano kizwi nka ‘Generation Z’ ruramagana uwo mushinga utaraba itegeko, ruvuga ko ugamije kuzahaza ubuzima bwabo.

Ibirego ku gipolisi

Polisi irashinjwa kurasa amasasu nyayo ku bigaragambya kuri uyu wa kabiri, amashusho yashyizwe ku mbuga nkoranyambaga yerekana bamwe bakomeretse. Polisi irashinjwa kandi ko mu masaha 24 mbere y’imyigaragambyo yashimuse abantu bagera kuri 12, bivugwa ko bari mu bavuga rikumvwa ku mbuga nkoranyambaga aho uru rubyiruko ruhuriza imigambi yo kwigaragambya. Igipolisi ntacyo kiravuga kuri ibi birego.

Abantu babiri bapfiriye mu myigaragambyo nk’iyi yabaye mu cyumweru gishize. Mu mpera z’icyumweru gishize, Perezida William Ruto yavuze ko ubutegetsi bwe bwifuza kuganira n’uru rubyiruko bukumva impungenge zabo.