Menya indirimbo eshanu zambere zivuga ku matora ya 2024

Mu gihe kitageze ku kwezi, Abanyarwanda bazaba babukereye kwihitiramo Umukuru w’Igihugu uzayobora u Rwanda muri manda y’imyaka itanu iri imbere.

Ibikorwa byo kwiyamamaza ku bahatanira umwanya wa Perezida no kujya mu Nteko Ishinga Amategeko biratangira kuri uyu wa Gatandatu, tariki ya 22 Kamena 2024. Site 19 ziri hirya no hino mu gihugu zateguriwe ibikorwa byo kwamamaza umukandida wa FPR-Inkotanyi ku mwanya w’Umukuru w’Igihugu, nka kimwe mu bikorwa byitabirwa n’abantu b’ingeri zose.

Nk’uko bimaze kumenyerwa, igihe kibanziriza amatora n’igihe cyo kwiyamamaza ni umwanya mwiza ku nganzo y’abahanzi n’abaririmbyi. Abahanzi bakora mu nganzo bagahimba indirimbo zigaruka ku bigwi bya FPR-Inkotanyi n’umuyobozi wayo, Perezida Kagame Paul.

Ku rubuga nkoranyambaga rwa YouTube, hari indirimbo nyinshi ziri muri uwo mujyo, ariko izi ni eshanu z’ibanze zikomeje gukurura benshi ukurikije inshuro zimaze kurebwa.

1. Nywe PK24 – Nel Ngabo

Iyi ndirimbo yabanje gukanyuzaho bwa mbere mu 2021 yitwa ‘Nywe’. Nel Ngabo yayisubiyemo ayita ‘Nywe PK24’, ashyiramo amagambo ashima Perezida Kagame Paul kuba ari umuyobozi w’intangarugero. Iyi ndirimbo imaze kurebwa inshuro zisaga ibihumbi 375 mu byumweru bibiri imaze isubiwemo. Ngabo ashimangira ko Abanyarwanda bashyize imbere amahitamo ababereye kandi nta n’umwe ugomba kubatobera igihugu cyangwa ngo ashake kubafatira ibyemezo binyuranye n’icyerekezo cy’igihugu.

2. Ogera – Bruce Mélodie ft. Bwiza

Mu minsi itanu gusa imaze isohotse, indirimbo Ogera ya Bruce Mélodie na Bwiza imaze kurebwa n’abantu basaga ibihumbi 332 kuri YouTube. ‘Ogera’ ivuga ku rubyiruko rugiye gutora bwa mbere ruri mu kigero kimwe na Bwiza, ikanavuga ku bari mu kigero kimwe n’icya Bruce Mélodie bamaze gutora kenshi. Abahanzi bombi bakoresheje imvugo iherekejwe n’amashusho y’ibikorwa bifatika bigaragaza uburyo ku buyobozi bwa FPR-Inkotanyi, u Rwanda rwageze ku burumbuke n’iterambere bidasubirwaho.

3. Contre Succès remix – Dr Claude

Dr Claude, umuhanzi wamaze kuba ubukombe, yavuguruye indirimbo ye ‘Contre succès’ avuga ko bikoza ubusa abahora banenga u Rwanda. Mu ndirimbo, Dr Claude agaruka ku kamaro k’uburinganire, guhanga udushya, Girinka, mitiweli, iterambere mu ikoranabuhanga, umutekano usesuye, n’uburezi budaheza. ‘Contre succès’ imaze ibyumweru bibiri kuri YouTube, imaze kurebwa n’abantu basaga ibihumbi 128.

4. Igikumwe – Khalfan Govinda ft Tom Close, Massamba Intore n’abandi

Umuhanzi Khalfan Govinda hamwe n’abandi bahanzi b’ibigugu barimo Fireman, Tom Close, Massamba Intore, Marina, na Uncle Austin bahimba indirimbo ‘Igikumwe’. Iyo ndirimbo yatunganyijwe na Producer AB Godwin, ikerekana inzira y’iterambere u Rwanda rurimo. ‘Igikumwe’ imaze iminsi itatu ishyizwe ahagaragara, ariko imaze kurebwa n’abantu barenga ibihumbi 192. Urebye uko iteguye n’umudundo wayo, nta kabuza izashyushya Abanyarwanda mu gihe cyo kwamamaza FPR-Inkotanyi.

5. Afande – Danny Vumbi

Danny Vumbi, umuhanzi uzwi cyane mu kwandika indirimbo no kuzishyira mu majwi, nawe ntiyatanzwe. Abinyujije mu njyana ya Afrobeat, yaduhaye ‘Afande’, indirimbo irata ibigwi bya Perezida Kagame aho amwita ‘Afande’. Indirimbo ‘Afande’ imaze iminsi umunani isohotse, imaze kurebwa n’abantu basaga ibihumbi 129.