Abapolisi babeshye Umushinwa itegeko ritabaho bamurya akayabo

Umushinwa yariwe akayabo ka 5000 y’amadolari y’Amerika n’abapolisi bamubeshye ko gukundana n’umukobwa wo muri Zimbabwe bitemewe n’amategeko.

Umupolisi ukomoka ahitwa Bikita na mugenzi we bahatiye uyu mushinwa kwishyura amadorari 5.030 bamuhora ko yakundanye n’umugore wo muri Zimbabwe bitemewe, nkuko ubushinjacyaha bwabivuze.

Bivugwa ko uyu mushinwa, Gong Changlin, yari mu rukundo na Tafadzwa Maphosa, umuturage wo muri Zimbabwe.

Ku wa 12 Mata 2024, madamu Chengeto Pwaka, umugenzacyaha wo kuri sitasiyo ya Polisi ya Bindura, hamwe n’uwo bakoranaga, Nicodemus Mubvumbi, berekeje mu kirombe gicukurwamo amabuye y’agaciro cya Bikita bajya gushaka amafaranga mu bashinwa.

Ushinjwa ngo yabwiye umushinwa witwa Changlin ko yamenye ko akundana n’umunya Zimbabwe kandi ari icyaha ku Mushinwa kugirana umubano n’umugore wo muri Zimbabwe.

Pwaka yamweretse ikarita igaragaza ko akora mu ishami rishinzwe iperereza ku byaha (CID) maze amutegeka kumwishyura US $ 2000 ngo atamufunga.

Uyu Pwaka na mugenzi we babwiye uyu mushinwa ko bamenye ko yakuriyemo inda uyu mukunzi we bamusaba akandi kayabo byatumye atanga agera ku US$5 000.

Aba bapolisi bari gukurikiranwa n’ubutabera.