Leta ya RDC na AFC/M23 bigiye gutera intambwe ikomeye mu biganiro bya Doha

Intumwa z’ubutegetsi bwa Repubulika Iharanira Demokarasi ya Congo n’iz’ihuriro AFC/M23 ziri hafi yo gusinya amahame ngenderwaho aziganisha ku masezerano y’amahoro arambye.

Aya mahame ni umusaruro w’ibiganiro hagati y’impande zombi bibera mu mujyi wa Doha kuva muri Werurwe 2025, byateguwe na Leta ya Qatar.

Byari biteganyijwe ko ikiganiro n’abanyamakuru cyari gutangarizwamo ibikubiye muri aya mahame kibera kuri Minisiteri y’Ububanyi n’Amahanga ya Qatar ku mugoroba wo ku wa 18 Nyakanga, ariko cyasubitswe, cyimurirwa kuri uyu wa 19 Nyakanga.

Mu ngingo ziri muri aya mahame harimo ko buri ruhande rugomba kubahiriza amasezerano yo guhagarika imirwano yashyizweho umukono muri Mata 2025.

Impande zombi zemeranyije ko zizafasha impunzi ziri hanze gutaha ku bushake, hashingiwe ku masezerano RDC n’ishami ry’umuryango w’Abibumbye ryita ku mpunzi (HCR) byagiranye n’ibihugu bizicumbikiye.

Leta ya RDC na AFC/M23 byemeranyije ko bigomba gufata ingamba zigamije kurema icyizere hagati ya buri ruhande, zirimo gutegura uburyo imfungwa zizarekurwa, Komite mpuzamahanga y’umuryango Croix Rouge (ICRC) ikabigiramo uruhare.

Nk’uko aya mahame abigaragaza, kugira ngo amahoro arambye muri RDC aboneke, ni ngombwa ko Leta isubirana ibice by’igihugu itakigenzura. Uburyo bizakorwamo burasobanurwa natangazwa.

Biteganyijwe ko aya mahame namara gusinywa, impande zombi zisabwa gutangira ibiganiro by’amahoro biyashingiyeho mu gihe cya vuba, kugira ngo zigere ku masezerano y’amahoro.

Iki cyiciro cy’ibiganiro bya Leta ya RDC na AFC/M23 byatangiye mu cyumweru gishize, cyongerewe imbaraga kuko hitabiriye abayobozi bo ku rwego rwo hejuru barimo Minisitiri w’Ububanyi n’Amahanga wa RDC, Jacquemain Shabani.

Minisitiri w’Umutekano w’Imbere w’u Rwanda, Dr. Vincent Biruta, Massad Boulos uhagarariye Leta Zunze Ubumwe za Amerika, intumwa ya Togo n’umuryango wa Afurika Yunze Ubumwe babikurikiraniye i Doha kuva mu cyumweru gishize.

Amerika ishaka ko Leta ya RDC na AFC/M23 bigera ku masezerano vuba, kugira ngo ibone guhuza Perezida Paul Kagame na Félix Tshisekedi, aho “bazasinywa amasezerano ya nyuma”.