UMUGABO WITWAJE INTWARO NA PASIPORO YIMPIMBANO YAFATIWE AHO TRUMP YIYAMAMARIZAGA

Umugabo witwaje imbunda ebyiri ntoya zitemewe n’amategeko yatawe muri yombi hafi y’aho Donald Trump yariari  kwiyamamariza i Coachella muri leta ya California, nk’uko Polisi ibitangaza.

Radio BBC gahuza ivugako Vem Miller w’imyaka 49, yari atwaye imodoka ubwo yahagarikwaga n’abashinzwe umutekano kuri bariyeri bakamusaka bakamusangana izi ntwaro. Yahise ajya gufungwa nta kintu kindi kibaye, ashinjwa kuba yari afite imbunda zitemewe n’amategeko zirimo imwe ijyamo amasasu menshi.

Nyuma yo gufatwa basanze kandi atwaye imodoka ifite nimero ziyiranga (number plate) z’impimbano, kandi mu modoka basangamo pasiporo nyinshi ziriho amazina menshi, n’impushya nyinshi zo gutwara imodoka, polisi ivuga ko nimero ziranga imodoka yari yambaye incurano atari izemewe. Uwo mugabo Miller wafatanywe imbunda yaje kurekurwa by’agateganyo atanze ingwate ya $5,000.

Mu gihe hasigaye ibyumweru bitatu mbere y’amatora umutekano wa Trump n’aho yiyamamariza warakajijwe, cyane nyuma y’igikorwa cyo kugerageza kumuhitana mu kwezi kwa Nyakanga.

Urwego rurinda Perezida, n’abahoze ari ba perezida, ba Leta Zunze Ubumwe za Amerika ruzwi nka Secret Service, rwavuze ko Trump “ntiyari mu kaga”, kandi ko ibi bitabujije kwiyamamaza kwe gukomeza.

ISINGIZWE ERASME DIDIER