Rubavu: Adolphe wari umaze icyumweru Arongoye yanyoye Tiyoda arapfa

Ngirimana Adolphe wo mu karere ka Rubavu wari umaze icyumweru kimwe arongoye yanyoye Tiyoda arapfa nyuma yo guhabwa isambu itangana niyo yifuza.

Ibi byabereye mu murenge wa Mudende, akagari ka Bihungwe n’umudugudu wa Bihungwe, mu gitondo cyo kuri uyu wa mbere, tariki 12 Gashyantare 2024.

Umunyamabanga nshingwabikorwa w’Umurenge wa Mudende, Murindangabo Eric yatangarije Rwandanews24 ko Adolphe yari amaze icyumweru kimwe arongoreye munzu ya se.

Ati “Yari amaze icyumweru kimwe arongoreye munzu ya Se, bivuze ko inzu bayibagamo ari abagabo babiri, gusa murukerera Umugore wa Ngirimana yazindutse ajya guceba ibirayi, barumuna ba Ngirimana batangira gutabaza abaturanyi ko amaze kunywa Tiyoda ari gutaka kubabara munda, baratabara bamwihutana ku Kigo nderabuzima cya Mudende ariko apfa akihagera abaganga bataramwakira.”

Ubwo twakoraga inkuru umurambo wa nyakwigendera warimo ushyingurwa nyuma yo kuwuvana ku kigo nderabuzima.

Murindangabo yaboneyeho gusaba abaturage kwirinda icyaricyo cyose cyatuma umuntu yiyambura ubuzima, ahubwo ko yagaragariza Ubuyobozi ibibazo afite ku buryo ibishakirwa umuti, kuko bikemuka bu buryo bwiza.

Ngirimana Adolphe wiyahuye Rwandanews24 yamenye amakuru ko yari afite imyaka 23.