Polisi yafunze umugore wakase igitsina cy’umugabo we

Polisi ya Uganda yataye muri yombi umugore witwa Susan Namuganza, w’imyaka 34, nyuma y’ibyumweru birenga bitatu yihishe, akekwaho guca igitsina cy’umugabo we, Moses Kawubanya. Iki gikorwa kibabaje cyabaye ku itariki ya 10 Kamena ubwo Namuganza yakase igitsina cy’umugabo we akoresheje ikintu gityaye, nyuma akamuhunga.

Umuvugizi wa Polisi mu karere ka Busoga y’Amajyaruguru, Micheal Kasadha, yemeje ifatwa rya Namuganza, avuga ko yafatiwe mu karere ka Namutumba aho yari yihishe ku muvandiwe we. Namuganza yafungiwe kuri sitasiyo nkuru ya Polisi ya Kamuli, aho ashinjwa gushaka kwica no kwiba.

Kasadha yagaragaje ko ku itariki ya 10 Kamena, mu masaha ya mu gitondo, Moses Kawubanya w’imyaka 45 yari yagiye kwiyuhagira, akagaruka mu buriri yambaye isume. Nyuma yaho, umwana wabo w’amezi 3 yatangiye kurira, maze Kawubanya atekereza ko umugore we agiye gushaka amata yo kumuha. Ahubwo, Namuganza yagarutse amusimbukira, amuca igitsina maze ahunga atwaye amafaranga ataramenyekana umubare.

Kawubanya yasigaranye ububabare bukabije, ariyambaza abaturanyi bamujyana mu bitaro bikuru bya Kamuli kugira ngo avurwe. Nyuma y’ibyumweru bitatu, Kawubanya yavuriwe mu bitaro, akavurwa n’abaganga, yaje gusezererwa ku wa mbere tariki ya 1 Nyakanga.

Umuvugizi wa Polisi, Bwana Kasadha, yavuze ko iperereza ryamaze kurangira kandi ko Susan Namuganza azashyikirizwa urukiko kugira ngo yiregure ku byaha ashinjwa.