Ikipe y’Igihugu ya Portugal, ikinamo Cristiano Ronaldo, yasezerewe mu Gikombe cy’Isi cya 2026 itarenze muri 1/8, nyuma yo gutsindwa na Espagne igitego 1-0 cyinjijwe na Mikel Merino mu minota y’inyongera.
Ni umukino wihariwe na Espagne ku rwego rwa 55% ndetse ni yo yabonye uburyo bukomeye bwashoboraga kuvamo igitego hakiri kare.
Mikel Oyarzabal yananiwe gufungura amazamu ku munota wa munani, aho yacomekewe umupira agasiga ubwugarizi bwa Portugal, ateye ishoti rijya ku ruhande.
Umunyezamu wa Espagne, Unai Simon, yakuyemo uburyo bubiri burimo umupira wa Cristiano Ronaldo yashyize muri koruneri mbere y’uko na Diogo Costa akuramo umupira wa Lamine Yamal n’uwa Baena mu minota 15 ibanza.
Ku munota wa 43, Nuno Mendes yateye ishoti ryakozweho n’umukinnyi wa Espagne mbere yo gukubita umutambiko.
Ku munota wa 70, João Cancelo na João Félix bahaye umwanya Diogo Dalot na Rafael Leão ku ruhande rwa Portugal yari imaze iminota mike ikoze izindi mpinduka aho Semedo yasimbuye Nuno Mendes wavunitse.
Diogo Costa yagumishije Portugal mu mukino, akuramo umupira watewe na Lamine Yamal wari umaze gikinirwa nabi inyuma y’urubuga rw’amahina ku munota wa 72.
Mikel Merino winjiranye mu kibuga na Fabian Ruiz basimbuye Dani Olmo na Pedri ku munota wa 85, ni we wakoze ikinyuranyo muri uyu mukino, atsinda igitego ku munota wa 91 nyuma yo guherezwa na Ferran Torres.
Muri ¼, Espagne izahura n’ikipe ikomeza hagati y’u Bubiligi na Leta Zunze Ubumwe za Amerika byisobanura guhera Saa Munani z’ijoro.
Gusezererwa kwa Portugal bivuze ko Cristiano Ronaldo w’imyaka 41 yamaze gukina umukino we wa nyuma mu Gikombe cy’Isi yatangiye gukina mu 2006 aho mu mikino 27 yagaragayemo, yatsinze ibitego 11 anatanga ‘assists’ ebyiri.
Que pensez-vous de cet article ?
J'aime
Amour
Heureux
Haha
Triste
