AU yashyize u Rwanda mu bihugu biza ku isonga mu koroshya urujya n’uruza ku Banyafurika

Icyegeranyo cy’Umuryango wa Afurika Yunze Ubumwe gishyira u Rwanda mu bihugu biza ku isonga mu koroshya urujya n’uruza ku Banyafurika, gutangira ku gihe umusanzu no kwemeza byihuse amasezerano aba yashyizweho umukono n’uyu muryango.

Tajan Ibrahim ukomoka muri Nigeria, avuga ko yakozwe ku mutima ubwo yari ageze ku kibuga mpuzamahanga cy’indege i Kanombe avanyemo Amadorari 100 yo kwishyura viza, akabwirwa ko nk’Umunyafurika atagomba kwishyura.

Ethiopia, Kenya, u Rwanda, Repubulika ya Gambia na Tanzania ni byo bihugu biza ku isonga mu mpuzandengo y’amanota bashingiye ku bipimo 4 byubakiye ku nkingi zirimo koroshya urujya n’uruza hakurwaho viza, kwiyemeza gushyira umukono ku  masezerano yemejwe n’uyu muryango, gutangira ku gihe imisanzu ya buri gihugu, kwitabira kwakira inama z’uyu muryango no kuzitabira.

Byumwihariko, u Rwanda, Benin na Gambia ni byo byanikiye ibindi bihugu mu koroshya urujya n’uruza bivaniraho viza abaturage bo kuri uyu Mugabane.

Umuyobozi w’ihuriro ry’abayobozi bashinzwe abakozi mu Rwanda, Steven Karangwa asanga urujya n’uruza rw’umurimo rudakwiye kugira uwo rutera ikibazo kuko ari amahirwe no ku Rwanda.

Ubwo yari mu ihuriro rya 13 ry’ikigo mpuzamahanga cy’ubukerarugendo ryabereye i Kigali mu Gushyingo 2023, Perezida Paul Kagame yongeye guha ikaze abagana u Rwanda bitewe n’uko rwaguye amarembo.

U Rwanda kandi runagaragara mu bihugu 3 bya mbere byihutira gushyira umukono ku masezerano bakanayemeza nk’amategeko igihugu kigenderaho, ndetse ruri mu bihugu 7 bya mbere bitangira ku gihe umusanzu bisabwa mu kunganira ingengo y’imari y’uyu Muryango wa Afurika Yunze Ubumwe.

Ibihugu biza inyuma birimo Centrafrique, Guinea, Liberia, Somalia n’ibirwa bya Sao Tome & Principe.