Yakatiwe Gufungwa Imyaka 6 Nyuma yo Gutuka Umukuru w’ Igihugu

Mu gihugu cya Uganda, urukiko rukuru rwakatiye Edward Awebwa, w’imyaka 24, gufungwa imyaka itandatu kubera amagambo yo gutuka Perezida Yoweri Kaguta Museveni n’umuryango we yanyujije kuri TikTok.

Awebwa wavutse nyuma y’imyaka 14 Museveni agiye ku butegetsi, yarezwe gukoresha imvugo y’urwango no gukwirakwiza “amakuru ayobya ndetse aharabika” Perezida Museveni, umugore we Janet Museveni, n’umuhungu wabo Muhoozi Kainerugaba.

Awebwa yemeye icyaha ndetse anagisabira imbabazi, ariko urukiko rwanzuye ko amagambo yatangaje yari “nyandagazi cyane” ndetse ko atagaragaje kwicuza bihagije.

Umucamanza Stella Maris Amabilis yemeje ko Awebwa akwiye igihano kizatuma yigira ku hahise he kugira ngo ubutaha azubahe Perezida, umugore we, n’umuhungu wabo. Yakatiwe gufungwa imyaka itandatu kuri buri kirego mu birego bine ashinjwa, ariko azabirangiza icyarimwe.

Imiryango iharanira uburenganzira bwa muntu yamaganye iki cyemezo, ivuga ko kigamije guhonyora uburenganzira bwo kuvuga icyo umuntu atekereza.

Ibi bibaye nyuma y’uko umwanditsi Kakwenza Rukirabashaija, na Stella Nyanzi, impirimbanyi n’umwanditsi, bafungiwe amagambo batangaje anenga ubutegetsi bwa Museveni. Bagiye bahungira mu mahanga nyuma yo gufungwa no kuvuga ko bakorewe iyicarubozo.

Perezida Museveni