Ushinjwa kwica abagore 42 akabajugunya mu ngarani yatorotse gereza aburirwa irengero

Kuri uyu wa Kabiri tariki ya 20 Kanama 2024, umugabo witwa Jumaisi Collins wo mu gihugu cya Kenya yatorotse kasho ya Polisi iri i Nairobi, aho yari afungiye akekwaho kwica abagore bagera kuri 42, harimo n’umugore we, maze akajugunya imirambo yabo muri kariyeri ishaje.

Uyu mugabo yari yatawe muri yombi mu kwezi gushize nyuma y’aho inzego z’umutekano zasanzemo imirambo itandatu ipfunyitse mu mashashi ya pulasitike muri kariyeri ya Kware, isigaye ikoreshwa nk’ikimoteri. Polisi yahise itangira iperereza, bikaza kurangira Jumaisi afashwe.

Umuvugizi wa Polisi, Onyango Resila, yatangaje ko Jumaisi yatorotse stasiyo ya polisi ya Gigiri ari kumwe n’abenegihugu 12 ba Eritrea.

Nubwo uyu mugabo yemeye icyaha cyo kwica abagore 42, umwunganizi we yabwiye urukiko ko umukiriya we yemeye icyaha kubera iyicarubozo yakorewe, ariko abashinjacyaha bakaba bahakana ibyo guhutazwa. Iperereza riracyakomeje mu gushakisha uyu mugabo watorotse no kumenya neza ukuri kw’ibyaha aregwa.