Umuvugizi wa RIB Dr. Murangira yavuze ikintu gikomeye kuri Yago

Umuvugizi w’Urwego rw’Igihugu rw’Ubugenzacyaha (RIB), Dr. Murangira Thierry, yatangaje ko umunyamakuru ndetse n’umuhanzi Nyarwaya Innocent, uzwi nka Yago Pon Dat, yahunze igihugu mu gihe yakurikiranwagaho ibyaha biremereye.

Yago Pon Dat, uzwi mu itangazamakuru no mu muziki, yamenyekanye mu minsi ishize ahanganye n’abakoresha imbuga nkoranyambaga batandukanye. Aherutse gutangaza ko yahunze u Rwanda, avuga ko yari ahunze agatsiko k’abantu bashatse kumwica mu myaka ine ishize. Mu butumwa yashyize kuri YouTube tariki ya 31 Kanama 2024, Yago yumvikanye avuga ku bantu bafitanye amakimbirane, harimo abanyamakuru, abahanzi, n’ibindi byamamare.

Mu kiganiro cyatambutse kuri Primo Media Rwanda ku wa 3 Nzeri 2024, Dr. Murangira Thierry yatangaje ko ubwo Yago yahungaga, RIB yari yaratangije iperereza ku byaha biremereye akurikiranwagaho. Ibyaha birimo kubiba amacakubiri n’ivanguramoko.

Dr. Murangira yavuze ati, “Yago yarahamagawe, arabazwa, yongera gushyira videwo hanze, videwo yarimo amagambo wumva arimo amacakubiri, aganisha ku macakubiri n’ivangura, arabazwa, arakurikiranwa. Muri cya gihe rero ibimenyetso byegeranywaga, ni bwo twagiye kumva, twumva na we aravuze ngo yarahunze.”

Nyuma yo kubona ko akurikiranyweho ibyaha biremereye, Yago yahisemo guhunga igihugu. Gusa, Dr. Murangira yatangaje ko Yago akomeje gukora ibiganiro ku mbuga nkoranyambaga biganisha ku byaha nk’ibyo yakurikiranwagaho.

Umuvugizi wa RIB yasoje agira inama abantu bakorera ibyaha hanze y’igihugu, yibutsa ko ubutabera bwabakurikirana aho bari hose, ndetse abasaba kugendera mu nzira nziza aho guhindura imbuga nkoranyambaga ibikoresho byo kubiba urwango n’amacakubiri.

Dr. Murangira yibukije abantu nka Yago ko imbuga nkoranyambaga zitagomba kuba umuyoboro w’amacakubiri, ahubwo zikwiye gukoreshwa mu nyungu z’abaturage. Yanasabye abakora ibyaha bakoresheje imbuga nkoranyambaga kwirinda kugwa mu mutego w’ivangura n’amacakubiri, bakirinda gukora ibikorwa bibangamiye umutekano w’igihugu.