Umusirikare yarashe umukuriye kubera kunyereza umushahara we

Mu kigo cya gisirikare cya Karisimbi giherereye i Goma mu Burasirazuba bwa Repubulika Iharanira Demokarasi ya Congo (RDC), haravugwa inkuru y’akababaro aho umusirikare witwa Banza Ilunga yishe mugenzi we Capitaine Albert Bosina amuziza kunyereza umushahara we.

Iyi mpanuka yabaye ku wa Gatatu tariki ya 21 Kanama 2024, ahagana saa Cyenda z’amanywa, ubwo Ilunga yarasaga Bosina amasasu 17. Bosina yari ushinzwe imari mu mutwe wa gisirikare wa 33 w’abarwanira mu mazi, kandi bivugwa ko Ilunga amaze amezi 16 adahabwa umushahara we.

Nyuma yo kumwica, Ilunga yahise ajya kwirega, akaba yahise atabwa muri yombi.

Iyi nkuru ikomeje guca igikuba mu ngabo za FARDC, bitewe n’uko yerekana ikibazo gikomeye kijyanye n’icungamutungo mu ngabo z’iki gihugu.