Umunyamakuru wa Radio10 yasezeye ajya muri Rayon Sports

Kuri iki Cyumweru taliki ya 12 Gicurasi 2024 nyuma y’umukino wahuzaga ikipe ya Manchester United na Arsenal zo muri shampiyona y’Ubwongereza, nibwo Uwizeyimana Sylvestre uzwi nka Wasili yahise atangaza ko ariwo munsi wa nyuma yumvikanye kuri Radio10 nk’umukozi wayo.

Ntabwo yahise atangaza ahandi agiye gukomereza akazi ariko yavuze ko mu minota mike abantu bari kuba babimenye akoresheje imbugankoranyambaga ze zirimo nka Instagram.

Mugenzi we bari barikumwe kandi bari bamaze igihe bakorana ikiganiro cy’imikino cya nimugoroba cyibanda cyane ku makuru ya siporo y’iburayi, Cedrick uzwi nka Cedro, yahise amubwira ko ababaye ariko ko ntakundi byagenda agomba kubyemera, gusa avuga ko yamubereye umuvandimwe kandi ko ubushuti bafitanye buzakomeza.

Ibi bibaye nyuma y’imyaka ibiri avuye mu kazi k’ikipe ya Rayon Sports, aho uyu umunyamakuru w’imikino, Uwizeyimana Sylvestre uzwi nka Wasili yahavuye yerekeza kuri Radio10, none yongeye guhabwa akazi muri Gikundiro.

Mu 2022 mbere gato y’itangira ry’Igikombe cy’Isi cyabereye muri Qatar, ni bwo Radio10 yatangaje ko Uwizeyimana Sylvestre uzwi nka Wasili ari umunyamakuru mushya mu gice cy’imikino.

Uyu munyamakuru ufite ubuhanga mu kogeza imikino ndetse no gusesengura amakuru y’imikino, yari avuye kuri Rayon Sports TV, cyane ko yari anasanzwe yogeza imikino y’iyi kipe.

Nyuma y’imyaka ibiri abarizwa ku Gishushu, yongeye guhabwa akazi muri Rayon Sports nk’umunyamakuru uzakorana n’Umuvugizi w’iyi kipe. Guhera kuri uyu wa mbere, Wasili agiye kujya akora mu kiganiro kizajya kigaruka ku makuru y’imbere ya Rayon Sports, kizwi nka “Rayon Time.”

Iki kiganiro azagikorana na Roben Ngabo usanzwe ari Umuvugizi wa Gikundiro. Kizajya gica ku Isango Star Saa Yine kugeza Saa Tanu z’amanywa kuva ku wa mbere kugeza ku wa Gatandatu, mu gihe ku Cyumweru kizajya gikorwa Saa Tanu kugeza Saa Sita z’amanywa.

Wasili yaciye mu bitangazamakuru bitandukanye birimo Contact FM & TV, BTN TV na BPLUS TV.

Uwizeyimana Sylvestre uzwi nka Wasili yasezeye Radio10 asubira muri Rayon Sports