Umukino wa APR FC na Rayon Sports wasubitswe, uzashakirwa indi tariki

Ubuyobozi bwa Shampiyona y’icyiciro cya mbere mu Rwanda (Rwanda Premier League) bwatangaje ko umukino wagombaga guhuza APR FC na Rayon Sports ku itariki ya 19 Ukwakira 2024 wasubitswe. Ibi byaje nyuma y’ubusabe bwa APR FC bwo gusaba ko ingengabihe isanzwe ya Shampiyona yakubahirizwa, bityo uyu mukino ukazashakirwa undi munsi uzakinirwaho.

Aya makipe azwiho guhangana cyane muri ruhago y’u Rwanda, APR FC na Rayon Sports, yagombaga guhurira kuri Stade Amahoro tariki ya 19 Ukwakira, mu mukino w’ikirarane cy’umunsi wa gatatu wa shampiyona. Uyu mukino wari uteganyijwe gukinwa tariki ya 14 Nzeri 2024, ariko usubikwa kubera ko APR FC yari ifite undi mukino mpuzamahanga na Pyramids FC.

APR FC yandikiye Urwego rutegura Shampiyona y’icyiciro cya mbere isaba ko hakurikizwa ingengabihe isanzwe, bitewe n’uko ifite ibirarane bibiri byari bikeneye kwitabwaho mbere y’umukino wa Rayon Sports.

Mudaheranwa Youssuf Hadji, Chairman wa Rwanda Premier League, yemeje ko umukino wa “derby” wagombaga guhuza APR FC na Rayon Sports uzasimbuzwa uwo APR FC izahuramo na Gasogi United ku munsi wa gatandatu wa shampiyona. Yagize ati: “Twari twashyize uyu mukino wa “derby” imbere kubera ko nta yindi week-end yari iboneka ngo dukinirwemo umukino ukomeye nk’uyu. Ubu tugiye gukurikiza ingengabihe isanzwe ya Shampiyona, bivuze ko APR FC izahura na Gasogi United ku wa 19 Ukwakira.”

Amakuru dufite ni uko nyuma y’umukino w’u Rwanda na Bénin uzaba tariki ya 15 Ukwakira 2024, Stade Amahoro izahagarikwa gukoreshwa by’agateganyo kugira ngo ikibuga gikorerwe isuku n’ibindi bikorwa byo kurangiza neza imirimo y’ubwubatsi itari yararangiye neza.

Iyi gahunda nshya y’ingengabihe ya shampiyona izasobanurwa neza mu minsi iri imbere, hibandwa ku buryo bwo kwirinda ko hakongera kuba akavuyo k’imikino y’ikirarane.