Umugabo yitwa Ntirivamunda Elie yishwe n’inyama

Ntirivamunda Elie, Umunyarwanda w’imyaka 40 ukomoka mu Murenge wa Rugarama, Akarere ka Burera, yapfiriye mu karere ka Kisoro muri Uganda anizwe n’inyama ubwo yari mu kabari.

Amakuru yatangajwe na Radio Boona avuga ko Ntirivamunda yari yasohokanye n’umukobwa we kuri uyu wa 29 Nzeri 2024, nyuma y’igihe kinini batabonana. Mu ifunguro basangiye harimo inyama, ariko mu gihe Ntirivamunda yari atamiriye imwe muri zo, yamunize bituma apfa.

Uyu mukobwa we, usanzwe ari umunyeshuri, yagaragaje agahinda kenshi ubwo yabonaga se apfa. Yagize ati: “Nashenguwe no kubona data yapfuye. Twari twongeye guhura nyuma y’igihe, ansaba ko dusangira.”

Ntirivamunda yari azwi cyane mu gace ka Kamonyi muri Kisoro, aho yari asanzwe ari umukiriya uhoraho w’akabari ka Hamis Bakunda, nyamara ntiyari yaribaruje nk’umuturage muri ako gace nk’uko ubuyobozi bwabihamije.

Uru rupfu rwatunguye benshi muri ako karere, aho abaturage bagaragaje agahinda kubera uburyo Ntirivamunda yitabye Imana anizwe n’inyama.