Umubare w’abanyamahanga bakina muri Shampiyona y’u Rwanda wongerewe

Ishyirahamwe ry’Umupira w’Amaguru mu Rwanda (Ferwafa) ryemeje ko umubare w’abanyamahanga bemerewe gukina muri Shampiyona y’Icyiciro cya Mbere (Rwanda Premier League) wongerewe ukagera ku 10, uvuye kuri batandatu.

Gusa, mu mikino, hazajya habanzamo abanyamahanga batandatu gusa, mu gihe abandi bane bazajya basimburana hagati yabo, ariko bitarenze batandatu bari mu kibuga icyarimwe.

Ibi byakozwe nyuma y’uko Rwanda Premier League isabye ko umubare w’abanyamahanga wiyongera kugira ngo amakipe y’u Rwanda arusheho kuba atyaye no guhangana ku rwego mpuzamahanga.

Ferwafa yemeye kuzamura umubare w’abanyamahanga nubwo itashyizeho umubare wifuzwaga wa 12, ahubwo wemeza abanyamahanga 10.

Uyu mwanzuro uje nyuma y’aho umutoza w’ikipe y’igihugu, Torsten Frank Spittler, agaragaje impungenge z’uko kongera umubare w’abanyamahanga bishobora kugira ingaruka ku iterambere ry’abakinnyi b’Abanyarwanda, kuko urwego rw’abanyamahanga bazanwa mu Rwanda kenshi ruba ruri hasi, bityo bikabangamira amahirwe y’Abanyarwanda yo gukina no gutera imbere mu makipe yabo.