Uganda: Abarenga 100 Bafunzwe Bazira Imyigaragambyo

Polisi ya Uganda yatangaje ko yataye muri yombi abantu 104 barimo abateguye n’abitabiriye imyigaragambyo yamagana abayobozi banyereza umutungo w’igihugu.

Iyi myigaragambyo yari igamije kwerekana ko abaturage batishimiye uburyo umutungo w’igihugu ukoreshwa, kandi yari yabujijwe n’ubuyobozi bwa Leta.

Umuvugizi wa Polisi ya Uganda, Kituuma Rusoke, yavuze ko aba bantu batawe muri yombi hagati ya tariki ya 22 n’iya 24 Nyakanga 2024, bazira kurenga ku ibwiriza ribabuza kwigaragambya. Mu butumwa yanyujije ku rubuga nkoranyambaga X, Rusoke yagize ati:

“Muri rusange, abantu 104 bafunzwe hagati ya tariki ya 22 n’iya 24 Nyakanga, 100 muri bo bajyanywe mu rukiko.”

Ku munsi w’imyigaragambyo nyirizina, tariki ya 23 Nyakanga, hamenyekanye ko abantu 75 batawe muri yombi. Muri abo, 74 bahise bajyanwa mu rukiko, mu gihe undi umwe akiri muri kasho ya Polisi.

Abatawe muri yombi mbere y’umunsi w’imyigaragambyo baketsweho kuyitegura. Abo barimo Francis Zaake, Hassan Kirumira, na Charles Tebandeke bo mu ishyaka ritavuga rumwe n’ubutegetsi, NUP (National Unity Platform), hamwe n’abandi barindwi.

Perezida wa Uganda, Yoweri Museveni, ku wa 25 Nyakanga yasobanuye ko impamvu abaturage babujijwe kwigaragambya ari uko Leta yari ifite amakuru ko hazakorerwamo ubugizi bwa nabi kandi hari abanyamahanga bayiteye inkunga.

Museveni yashimiye abashinzwe umutekano barimo abasirikare n’abapolisi babashije gukumira iyi myigaragambyo itaragera ku ngoro y’Inteko Ishinga Amategeko nk’uko abayiteguye bari babiteganyije.

Abapolisi n’abasirikare benshi boherejwe mu bice bitandukanye bya Kampala kugira ngo bakumire iyi myigaragambyo. Polisi ya Uganda yatangaje ko yashoboye guta muri yombi abantu 104 bafite aho bahurira n’iyi myigaragambyo.