U Rwanda rwategetse Ubwongereza kwishyura asaga Miliyari 89 Frw

U Rwanda rwasabye Ubwongereza kwishyura miliyoni 50 z’amapawundi (abarirwa muri miliyari zisaga 89 z’amafaranga y’u Rwanda) nyuma y’uko Ubwongereza butubahirije amasezerano yo kohereza abimukira mu Rwanda.

Ubwongereza bwari bwasabye u Rwanda ko rwareka kwishyuza ayo mafaranga, hashingiwe ku mubano mwiza ibihugu byombi byari bifitanye. Icyakora u Rwanda rwisubiyeho nyuma y’uko Ubwongereza burufatiye ibihano kubera ko rwanze gukuraho ingamba zo kurinda umutekano ku mupaka warwo na Repubulika Iharanira Demokarasi ya Congo (RDC).

Iki cyemezo cyafashwe nyuma y’uko umutwe wa M23 wafashe imijyi ya Goma na Bukavu, bigatera umwuka mubi hagati y’u Rwanda n’Ubwongereza. RDC ishinja u Rwanda gutera inkunga uwo mutwe, ariko u Rwanda ruhakana ibyo birego, ruvuga ko rugira ingamba z’ubwirinzi.

Indi mpamvu yatumye u Rwanda rusaba kwishyurwa ni amagambo aherutse gutangazwa na Minisitiri w’Ubwongereza ushinzwe Afurika, Lord Collins, ubwo yari imbere y’Inteko Ishinga Amategeko y’Ubwongereza ku wa 26 Gashyantare 2025. Yatangaje amagambo asebya u Rwanda, bikongera umwuka mubi hagati y’ibihugu byombi.

Ikinyamakuru The Telegraph cyatangaje amagambo y’Umuvugizi wa Guverinoma y’u Rwanda, Yolande Makolo, aho yagize ati: “Turishyuza ayo mafaranga rero, kuko amasezerano ateganya ko Leta y’Ubwongereza igomba kuyishyura.”

Yolande Makolo yavuze ko u Rwanda rwoherereje Ubwongereza impapuro z’amafaranga agomba kwishyurwa angana na miliyoni 50 z’amapawundi. Yagize ati: “Ubwongereza bwasabye u Rwanda kwirengagiza ayo mafaranga kuko rutohereje abimukira mu Rwanda. Ubu busabe bwari bushingiye ku kwizera hagati y’ibihugu byombi, ariko Ubwongereza ntabwo bwubahirije ibyo bwasabwe.”

Umubano w’u Rwanda n’Ubwongereza wajemo agatotsi ubwo Ubwongereza bwafashe uruhande ku kibazo cy’umutekano muke mu burasirazuba bwa Congo. Ubwongereza bwatangaje ko bufatira u Rwanda ibihano, bushinja iki gihugu gufasha umutwe wa M23.

Gusa u Rwanda rwakomeje kuvuga ko rutagira uruhare mu bikorwa bya M23, ahubwo rukemeza ko rugomba gukomeza kwirindira umutekano ku mipaka yarwo. Rwatangaje ko rudashobora kwihanganira ibihano bishyirwaho bitagendeye ku kuri.

Biteganyijwe ko iki kibazo kizaganirwaho mu minsi iri imbere, aho hitezwe kurebwa niba Ubwongereza buzubahiriza ibyo bwiyemeje mu masezerano.