U Rwanda na Congo ku meza y’ibiganiro

Minisitiri w’Ububanyi n’Amahanga w’u Rwanda, Olivier Nduhungirehe, yatangaje ko u Rwanda na Repubulika Iharanira Demokarasi ya Congo (RDC) bongeye gusubira ku meza y’ibiganiro mu rwego rwo gushaka umuti w’umwuka mubi uri hagati y’ibihugu byombi. Ibi biganiro byabereye i Zanzibar muri Tanzania, mu mwiherero w’abayobozi bo muri Minisiteri z’Ububanyi n’Amahanga z’ibihugu bigize Umuryango wa Afurika y’Iburasirazuba (EAC).

Ibiganiro byari bihuriweho na Minisitiri w’Ububanyi n’Amahanga w’u Rwanda, Olivier Nduhungirehe, na Minisitiri w’Ububanyi n’Amahanga wungirije wa RDC, Gracia Yamba Kazadi. Byateguwe ku bufatanye na Tanzania na Sudani y’Epfo kandi byitabirwa n’abahagarariye Uganda na Kenya.

Minisitiri Nduhungirehe yavuze ko ibiganiro byagenze neza kandi byagaragaje ubushake bwo gushaka igisubizo cy’umwuka mubi uri mu Burasirazuba bwa RDC. Yashimangiye ko imyanzuro yafashwe igamije kubyutsa ibiganiro bya Luanda na Nairobi.

Perezida Paul Kagame yari aherutse kugaragaza ko u Rwanda rwiteguye gukomeza ibiganiro na RDC kugira ngo hagire igisubizo cya politike kiboneka. Yavuze ko u Rwanda rwiteguye gukorana neza na RDC mu gukemura ibibazo bihari no kongera amahoro mu karere.

Uyu mwiherero wari urubuga rwo kuganira ku bibazo bibangamiye ukwishyira hamwe kw’ibihugu bigize EAC, abaminisitiri bagatanga ibitekerezo byatuma amahoro arambye agerwaho n’ubufatanye mu mutekano bukongererwa imbaraga.