Tshisekedi yavuze ko Joseph Kabila ashaka guhirika ubutegetsi bwe

Perezida wa Repubulika Iharanira Demokarasi ya Congo, Felix Tshisekedi, yashinje uwahoze ari Perezida, Joseph Kabila, kuba ari we washinze ihuriro ry’imitwe imurwanya ifatanyije na M23, rizwi nka Alliance Fleuve Congo (AFC).

Tshisekedi yatangaje ibi ubwo yari i Bruxelles mu Bubiligi aho yagiye kwivuriza umugongo. Yagize ati:

“Joseph Kabila? AFC ni iye. Yanze kwitabira amatora ajya kwitegura intambara.”

Aya magambo ya Tshisekedi aje akurikira ibirego byatangajwe na Augustin Kabuya, uyobora ishyaka UDPS riri ku butegetsi, ariko bikaba byatewe utwatsi n’ishyaka PPRD rya Kabila.

Tshisekedi avuze ibi mu gihe hashize icyumweru urubyiruko rwo mu ishyaka rye rugabye igitero ku rugo rwa Kabila i Kinshasa, aho abasaga 70 batawe muri yombi.

Kuva yava ku butegetsi, Joseph Kabila yirinze kuvuga byinshi ku butegetsi bwa Tshisekedi wamusimbuye, nubwo bashwanye guhera mu 2020 ubwo ihuriro FCC rya Kabila na Cash rya Tshisekedi byahagarikaga ubufatanye byari bifitanye mu nzego z’imiyoborere.

Umwaka ushize, ishyaka rya Kabila ryanzwe kwitabira amatora rusange, rivuga ko imitegurire yayo nta cyizere itanga. Iri shyaka ryagaragaje impungenge ku mitegurire y’amatora, rikavuga ko nta bumwe n’ubwizerane biri mu buyobozi bw’igihugu.

Ibi birego bishobora gukomeza guteza umwuka mubi hagati ya Tshisekedi na Kabila, ndetse bikaba byanatuma haduka imyigaragambyo cyangwa ibikorwa by’ubugizi bwa nabi hagati y’impande zombi. Hari kandi impungenge ko ibi bishobora guhungabanya ituze n’umutekano muri Repubulika Iharanira Demokarasi ya Congo.