Trump yatangaje ko yatsinze amatora

Donald Trump wo mu ishyaka ry’Aba-Républicains yatangaje ko yegukanye intsinzi mu matora y’Umukuru w’Igihugu muri Amerika, nyuma yo guhigika abo bari bahanganye cyane cyane Kamala Harris.

Nubwo intsinzi ye itaremezwa neza, Donald Trump yavuze ko yiteguye gukemura ibibazo bimaze igihe byugarije igihugu cye birimo n’ibijyanye n’abimukira banyura ku mipaka itandukanye.

Yavuze ko urugendo rwe rwaranzwe n’ibizazane, ariko rurangiye neza.

Yashimiye umugore we, Melania Trump n’abana be bamubaye hafi muri uru rugendo.

Donald Trump yavuze ko gutsinda kwe ari intsinzi kuri Demokarasi, yizeza ko nta ntambara n’imwe azashoza ku gihugu ko ahubwo azazihagarika. Yavuze ko “Imana yarokoye ubuzima bwanjye kubera impamvu. Impamvu ni ukongera kubaka igihugu cyacu”.

Donald Trump yizeye intsinzi mu matora y’Umukuru w’Igihugu yabaye ku wa 5 Ugushyingo 2021, nyuma yo kubona amajwi 267 ya Electoral College. Arabura gusa amajwi atatu ngo yizere intsinzi bidasubirwaho.

Bamwe mu bayobozi bo hirya no hino ku Isi batangiye kwandika ubutumwa bwo kwifuriza Donald Trump imirimo myiza nka Perezida wa Leta Zunze Ubumwe za Amerika.

Mu babimburiye abandi harimo Minisitiri w’Intebe w’u Bwongereza, Keir Starmer na Perezida wa Ukraine, Volodymyr Zelenskyy. Bombi bavuze ko biteguye gukomeza gukorana nawe.