Trump arashinja ishyaka ryo mu Bwongereza kwivanga mu matora

Abashinzwe kwamamaza Donald Trump, umukandida w’aba Repubulikani mu matora ya Leta Zunze Ubumwe za Amerika, bikomye ishyaka Labour Party ryo mu Bwongereza barishinja kwivanga mu matora yo muri Amerika.

Abo bashyigikiye Trump bavuga ko hari abarwanashyaka ba Labour bakora ibikorwa byo kwamamaza Kamala Harris, umukandida w’aba Demukarate, ibyo bakabifata nk’itonesha rigamije kwangiza inyungu za Trump. Bagaragaje ko ibikorwa by’ubukorerabushake aba Labour bakora muri Amerika bifatwa nk’ubufasha butemewe mu buryo bw’amategeko.

Nubwo ibi birego byagiye ahabona, ishyaka Labour Party ryo ntacyo ryari ryabitangazaho kugeza ubu, gusa BBC yatangaje ko ibyo bikorwa bikorwa n’aba Labour mu buryo bwigenga, bitari ku izina ry’ishyaka.

Iyi mvugo iracyakomeje guteza impaka mu gihe amatora akomeje kwegera, kandi ibi birego bishobora gutuma hari ugushyamirana gukomeye hagati y’amashyaka yombi ndetse n’ibihugu bifitanye ubufatanye muri politiki.