SKOL yatandukanye burundu na Rayon Sports nyuma y’imyaka 12 bakorana.

Uruganda rw’ibinyobwa rwa SKOL Brewery Ltd (SBL) rwatangaje ko rwahagaritse imikoranire yari imaze imyaka 12 hagati yarwo n’Ikipe ya Rayon Sports rwari rubereye umuterankunga mukuru.

SKOL yabitangaje binyuze mu itangazo rigenewe abanyamakuru yashyize ahagaragara kuri uyu wa 8 Kamena 2026, ivuga ko “amasezerano y’impande zombi yageze ku musozo.”

Tariki ya 15 Gicurasi 2014 ni bwo Rayon Sports yasinyanye amasezerano y’imyaka itatu na SKOL yemeye kujya itanga miliyoni 47 Frw buri mwaka muri iyi kipe.

Mu 2017, ni bwo hasinywe amasezerano mashya ya miliyoni 66 Frw buri mwaka mu gihe cy’imyaka itanu.

Mu gihe cy’imikoranire mu myaka ishize, SKOL yatangaga miliyoni 1 Frw ku kwezi y’ikirango cyayo cyari ku modoka ya Rayon Sports itarapfa ndetse n’ibikoresho Rayon Sports yifashisha ku kibuga haba ku mikino cyangwa mu myitozo.

Rayon Sports yashoboraga kandi kuguza amafaranga muri SKOL mu gihe iyakeneye mu bikorwa bitandukanye byihutirwa, ikagira uburyo iyishyuramo binyuze mu masezerano.

Uru ruganda rwari rwaremereye Rayon Sports miliyoni 6 Frw mu gihe cyose yegukanye Igikombe cy’Amahoro, rugatanga kandi miliyoni 20 Frw zo kugura imyambaro y’ikipe buri mwaka w’imikino.

Tariki ya 29 Nzeri 2017, ni bwo SKOL yatashye ikibuga y’ubwatsi bwiza bw’ubuterano cyubatse mu Nzove kuri uru ruganda, cyuzuye gitwaye hafi miliyoni 100 Frw ndetse igishyikiriza Rayon Sports.

Iyi kipe yari imaze iminsi nta kibuga cyihariye igira cyo gukoreraho imyitozo ndetse yakodeshaga kenshi ibibuga byo gukoreraho, aho nka Stade Mumena yakodeshwaga ibihumbi 200 Frw ku kwezi.

Kuri iki kibuga, SKOL yahubatse kandi akabari ka “Rayon SKOL BAR”, aho amafaranga gacuruza binyuze mu bafana bitabira imyitozo y’ikipe muri aka gace cyangwa abahaturiye, yose yajyaga muri iyi kipe.

Tariki ya 14 Nyakanga 2020, SKOL yashyikirije kandi Rayon Sports amacumbi afite ubushobozi bwo kwakira abakinnyi 40. Aya macumbi ari mu nzu ebyiri zigerekeranye yubatse mu Nzove hafi y’ikibuga.

Hejuru y’ibi, Skol yagiraga uruhare no mu bikorwa by’abafana ba Rayon Sports birimo igihembo cy’umukinnyi w’ukwezi wa Rayon Sports, cyatangijwe n’itsinda ry’abafana “March’ Generation”.

Ku wa 8 Nyakanga 2022, Ikipe ya Rayon Sports yongereye amasezerano y’imikoranire yari ifitanye n’uru ruganda rwenga inzoga mu gihe cy’imyaka itatu, yari afite agaciro k’arenga miliyari 1 Frw ndetse ni yo yageze ku musozo.

Muri Gashyantare uyu mwaka, Rayon Sports yasinyanye amasezerano ya miliyari 5,1 Frw n’ikigo cyo muri Tanzania cya Jayrutt Investment Ltd azamara imyaka itanu.

Iyi kipe yambara ubururu n’umweru, izahagararira u Rwanda muri CAF Confederation Cup ya 2026/27, ivugwamo abandi baterankunga bashya barimo Banki ya Kigali.

Gusa ubwo Umuyobozi Mukuru w’iyi banki, Dr Diane Karusisi, yari abajijwe kuri aya makuru ku wa 24 Mata 2026, yagize ati “Uyu munsi turavuga BK Pro League. Ibya Rayon Sports cyangwa andi makipe, ayo makuru tuzayavugaho hageze.”