Rusizi: Yahawe 24 000Frw ngo ajye kurangura inzoga ayakina urusimbi

Mu karere ka Rusizi, umusore w’imyaka 29 witwa Hakiruwizera Aaron yatawe muri yombi nyuma yo kwishyurwa amafaranga y’u Rwanda 24,000 n’umucuruzi wo muri uwo mujyi kugira ngo amurangurire inzoga. Nyuma yo guhabwa amafaranga, aho kujya kurangura izo nzoga, Hakiruwizera yayajyanye mu mikino y’urusimbi aho yahombye byose, asigara nta kintu afite.

Umunyamabanga Nshingwabikorwa w’Umurenge wa Kamembe, Iyakaremye Jean Pierre avuga ko, uyu musore Hakiruwizera yari asanzwe akora akazi k’ubukarani mu mujyi wa Rusizi, akaba yari yizewe n’abantu batandukanye.

Yafashe amafaranga n’amakaziye abiri y’inzoga yari ahawe, akerekeza mu rusimbi rukunze gukinirwa rwihishwa n’insoresore ziba zishaka kwiba abaturage cyangwa izindi zahaze ibiyobyabwenge.

Mu gihe yageraga muri uwo mukino w’urusimbi, Hakiruwizera yatekerezaga ko azunguka amafaranga, maze akajya kurangura inzoga, ariko amahirwe ntaramusekera, agira igihombo cyose, ndetse asigarana amakaziye masa.

Aho kubona uko agaruka imbere y’umucuruzi wamwohereje, yafashe ya makaziye abiri maze ayagurisha ku mafaranga 10,000, ayajyana mu rusimbi asubirayo, ariko na none arahomba.

Nyuma yo guhomba amafaranga, uyu musore yarashobewe, asigarana 5,000 RWF asubira mu kabari, aho yanywereye inzoga kugeza afashwe.

Yari yasinze cyane ubwo inzego z’umutekano zamufataga, ahita ashyikirizwa Urwego rw’Igihugu rw’Ubugenzacyaha (RIB) ku Sitasiyo ya Kamembe kugira ngo abazwe iby’ayo mafaranga yakoresheje mu buhemu.

Iyakaremye Jean Pierre, umuyobozi w’Umurenge wa Kamembe, yatanze impanuro ku rubyiruko, asaba ko rwakwitandukanya n’imikino y’urusimbi kuko ishobora guteza ibyago bikomeye.

Yagaragaje ko ibiryabarezi n’imikino itemewe itwara amafaranga y’abaturage ibangamira imibereho myiza y’abaturage, ndetse igasenya ingo nyinshi.

Yavuze ko ubufatanye bw’inzego z’umutekano n’abaturage ari ngombwa mu kurwanya iyo mikino, ndetse yemeza ko abazitabira bose bazajya babihanirwa by’intangarugero.