Rubavu: Ikamyo yo mu bwoko bwa Howo yacitse feri igonga ibitaro bya Gisenyi ikomeretsa bane

Mu Karere ka Rubavu, ku muhanda winjira mu Mujyi wa Rubavu ahazwi nko kwa Gacukiro, habereye impanuka ikomeye y’ikamyo yinjiye mu bitaro bya Gisenyi.

Ni impanuka yabaye kuri uyu wa Kabiri tariki 07 Mutarama 2025 aho iyi kamyo yinjiye mu Bitaro bya Gisenyi nyuma yo gukora impanuka ikomeye biturutse ku kubura feri.

Iyo modoka yari yambaye pulake RAF 698 Z, yakoze impanuka yakomerekeje abantu babiri, shoferi n’undi muntu yari itwaye nk’uko byatangajwe n’Umuvugizi wa Polisi mu Ntara y’Iburengerazuba SP Karekezi Twizere Bonavature.

Yagize ati: “Impanuka yabaye mu saa kumi n’ebyiri z’Igitondo, yakomerekeyemo abanyamaguru babiri, Shoferi n’undi muntu yari atwaye”.

Amakuru avuga ko abantu bakomerekejwe n’iyo mpanuka bose barimo kwitabwaho mu bitaro bya Gisenyi.

Si ubwa mbere muri uyu muhanda habereye impanuka ikomeye imodoka ikinjira mu bitaro bya Gisenyi gusa urukuta rugongwa cyane rukaba rwari rwarubatswe mu buryo bukomeye.