Rubavu: Babiri mu basagariye Gitifu w’umurenge ubwo yari amaze gusenya inzu y’umuturage bari gukurikiranwa

Mu Karere ka Rubavu, abaturage babiri bo mu Murenge wa Nyakiliba barimo gukurikiranwa nyuma yo gusagarira Umunyamabanga Nshingwabikorwa w’uwo murenge, Uwimana Vedaste.

Ibi byabaye nyuma y’uko uyu muyobozi yari amaze gusenya inzu y’umuturage, yavuzweho ko yubatswe mu buryo butemewe n’amategeko.

Mu mashusho yakwirakwiye ku mbuga nkoranyambaga, hagaragaye Uwimana Vedaste asenya iyo nzu, ibintu byatumye abaturage bamwe bagira uburakari, bakamurwanya ndetse bamwe bagerageza no kumukubita, banakoresha amagambo yuje uburakari n’ibitutsi.

Umuyobozi w’Akarere ka Rubavu, Mulindwa Prosper, yavuze ko nyuma yo kubona ayo makuru, ubuyobozi bwahise butangira gukurikirana iby’iryo sakwe.

Yagize ati, “Hari abari gukurikiranwa kuko ntabwo twabireka ngo bigarukire aho. Hari ababigizemo uruhare bari gukurikiranwa n’abandi batabonetse ariko ni igikorwa gikomeza.”

Mulindwa yanasabye abayobozi bo mu nzego z’ibanze gushyira imbaraga mu kugenzura ko ibikorwa byo kubaka bikurikiza igishushanyo mbonera cy’akarere, ndetse no gukurikiza amategeko agenga imyubakire. Yasabye kandi abaturage kwirinda kubaka mu buryo butemewe n’amategeko kuko bishobora kubakururira ibihombo.