RDC: Abasirikare 25 bakatiwe urwo gupfa bazira guhunga urugamba

Ku wa Gatatu tariki ya 3 Nyakanga 2024, abasirikare 25 ba Repubulika Iharanira Demokarasi ya Congo (RDC) bakatiwe urwo gupfa n’Urukiko rwa Gisirikare rwa Butembo mu Ntara ya Kivu y’Amajyaruguru, bazira “guhunga umwanzi” mu gihe bari bahanganye n’abarwanyi b’umutwe wa M23. Urwo rubanza rwari rubereyemo abantu 31, barimo abasirikare 27 n’abagore bane ba bamwe muri bo.

Abasirikare bashinjwaga ibyaha birimo guhunga umwanzi, guta intwaro z’intambara, kurenga ku mategeko ndetse n’ubujura. Muri urwo rubanza, abasirikare 25 barimo babiri bafite ipeti rya Captain bakatiwe urwo gupfa, mu gihe abagore bane baregwaga bagizwe abere kubera kubura ibimenyetso bibashinja. Umunyamategeko Jules Muvweko, wunganiraga umwe muri bo, yavuze ko bagiye guhita bajuririra icyo cyemezo.

Mu mpera z’icyumweru gishize, umutwe wa M23 wafashe uduce tumwe na tumwe, harimo na Kanyabayonga, ifatwa nk’icyambu kigeza mu duce dukomeye tw’ubucuruzi twa Butembo na Beni. Ibi byatumye abasirikare b’igihugu batungwa agatoki n’urukiko rwa gisirikare kubera ko batashoboye guhangana n’aba barwanyi, bikaba byateye impungenge ku mutekano w’igihugu ndetse n’akarere kose muri rusange.