Perezida William Ruto wa Kenya yashyizeho Guverinoma nshya yinganjemo abo yaraherutse kwirukana

Perezida wa Repubulika ya Kenya, Dr William Samoei Ruto, kuri uyu wa 19 Nyakanga 2024 yatangaje icyiciro cya mbere cy’abaminisitiri 11 bazaba bagize guverinoma nshya. Muri aba baminisitiri, hari abagarutse ku myanya yabo mu guverinoma yari aherutse guseswa ku itariki ya 11 Nyakanga.

Abaminisitiri bashyizweho

1. Kithure Kindiki – Minisitiri w’Umutekano w’Imbere
2. Alice Wahome – Minisitiri ushinzwe ubutaka
3. Aden Duale – Minisitiri w’Ingabo
4. Soipan Tuya – Minisitiri ushinzwe kurengera ibidukikije
5. Deborah Mulongo Baraza – Minisitiri w’Ubuzima
6. Julius Mulongo – Minisitiri w’Uburezi
7. Andrew Muhia Karanja – Minisitiri w’Ubuhinzi
8. Davis Chirchir – Minisitiri ushinzwe imihanda
9. Margaret Nyambura – Minisitiri w’Ikoranabuhanga
10. Eric Murithi Muga – Minisitiri ushinzwe amazi
11. Rebecca Miano – Intumwa Nkuru ya Leta

Perezida Ruto yatangaje aba baminisitiri nyuma y’aho aseshe guverinoma yari iriho kuva mu Ukwakira 2023, akomeza gusigarana Minisitiri w’Intebe akaba na Minisitiri w’Ububanyi n’Amahanga, Musalia Mudavadi.

Perezida Ruto yatangaje ko akomeje ibiganiro n’Abanyakenya ndetse n’imitwe ya politiki itavuga rumwe n’ubutegetsi bwe kugira ngo bumvikane ku bajya muri guverinoma nshya. Yagize ati:

“Ibiganiro birakomeje kugira ngo tumvikanire ku bandi baminisitiri bazuzuza guverinoma nshya, kandi tuzaba twiteguye gushyira mu bikorwa ibyo twemeranyijeho.”

Perezida Ruto yanasobanuye ko Inteko Ishinga Amategeko ari yo izemeza aba baminisitiri bashyizweho, abandi nabo bakazashyirwaho mu gihe kitarambiranye hashingiwe ku bitekerezo azahabwa n’abo bari kuganira.

Ibibazo by’ubukungu byugarije Kenya byahungabanyije imibereho y’abaturage, bituma guhera muri Kamena 2024 bamwe bajya mu myigaragambyo basaba Perezida Ruto kweguza abaminisitiri, abandi bamusaba kwegura ubwe. Iyi myigaragambyo yatumye Perezida Ruto afata icyemezo cyo gusesa guverinoma kugira ngo abone uko aganira n’abaturage ndetse n’imitwe ya politiki ku bijyanye n’imikorere ya guverinoma nshya.