Perezida wa Amerika Joe Biden yanduye COVID-19

Perezida wa Leta Zunze Ubumwe za Amerika, Joe Biden, yanduye COVID-19 nk’uko byatangajwe n’ibiro bye. Biden w’imyaka 81, yapimwe ku wa Gatatu tariki 17 Nyakanga 2024, bagasanga yaranduye.

Biden yari ari mu bikorwa byo kwiyamamaza muri Las Vegas aho yaniteguraga gutanga ijambo mu nama ngarukamwaka ya UnidosUS, ubwo yagaragayeho ibimenyetso bya COVID-19, bamusuzuma bakamusangana iyo virusi.

Umuganga we yatangaje ko Biden yahawe dose ya mbere y’umuti wa Paxlovid kandi akaba agiye kwishyira mu kato mu rugo rwe muri Rehoboth Beach, Delaware nk’uko amabwiriza y’Ikigo cya Leta ya Amerika gishinzwe gukumira ibyorezo abiteganya.

Umunyamabanga ushinzwe itangazamakuru muri White House, Karine Jean-Pierre, yavuze ko ubutumwa bw’umuganga bugaragaza ko “Perezida yagaragaje ibimenyetso byo guhumekera hejuru, birimo gushoka kw’amazi yo mu mazuru kwa hato na hato, agakorora kadashira ndetse no kumva atameze neza muri rusange.”

Karine yavuze ko Biden yari ameze neza mu gihe cy’igikorwa cya mbere yakoze, ariko nyuma kuko yumvise atameze neza, byabaye ngombwa ko apimwa COVID-19, ibisubizo bigaragaza ko afite iyo virusi.

Abari bateguye inama ya UnidosUS bamenyesheje abatumirwa ko Biden atabashije kuyitabira, na bo bavuganye na we akabahamiriza ko yasanzwemo COVID-19.