Perezida Tshisekedi yashyizeho Visi-Guverineri w’Intara ya Kivu y’Amajyaruguru uje guhangana na M23

Perezida Félix Tshisekedi wa Repubulika Iharanira Demokarasi ya Congo (RDC) yashyizeho impinduka mu buyobozi bw’Intara ya Kivu y’Amajyaruguru, agira Karawa Dengamo, komiseri muri Polisi y’Igihugu, Visi-Guverineri w’iyi Ntara.

Iyi myanzuro yatangajwe kuri radiyo na Televiziyo by’igihugu (RTNC) ku wa Gatanu, tariki ya 7 Werurwe 2025, nk’igikorwa cyo kongera imbaraga mu guhangana n’umutwe wa M23, umaze igihe mu maboko y’iyi ntara.

Karawa Dengamo azasimbura Komiseri Romuald Ekuka, wari kuri uyu mwanya mbere y’uko M23 yigarurira umujyi wa Goma, ahagana mu ntangiriro z’uyu mwaka. Karawa yari asanzwe ari komiseri muri Polisi y’Igihugu, kandi azaba ashinzwe gufasha guverineri w’Intara, Jenerali Majoro Somo Kakule Evariste, wasimbuye Maj.Gen. Chilimwami Nkuba nyuma y’urupfu rwa nyakwigendera ku murongo w’urugamba.

Mbere y’uko agirwa Visi-Guverineri, Louis Segond Kawara yari umuyobozi wa Polisi mu karere ka Mai-Ndombe. Inteko y’Intara ya Mai-Ndombe yari yasabye ko uwo mwanya utangwa ku muntu utari umusivili, ndetse Karawa Dengamo akaba yarahawe inshingano z’umuyobozi wungirije muri Kivu y’Amajyaruguru.

Izi mpinduka zashyizweho na Perezida Tshisekedi zigamije gukomeza gushyira imbaraga mu guhangana na M23, umutwe wigaruriye intara ya Kivu y’Amajyaruguru, ndetse n’ibindi bice bya Kivu y’Amajyepfo.

Karawa Dengamo azayobora hamwe na guverineri mukuru w’iyi ntara, Jenerali Kakule, mu bihe bikomeye byo kubohoza ibice byari byarigaruriwe.

Biro by’ubuyobozi bwa Kivu y’Amajyaruguru byimuriwe mu teritwari ya Beni, aho bakomeza gutegura ingamba zo gusubiza mu maboko y’igihugu intara y’igihugu iri mu ntoki z’imitwe yitwara gisirikare.

Ibi byose bigamije kurwanya ibikorwa bya M23, hagamijwe kugarura amahoro no kongera umutekano mu gihugu, cyane cyane mu duce twibasiwe n’imitwe yitwara gisirikare.