Perezida Paul Kagame yahinduriye imirimo uwari Minisitiri w’Uburezi

Ku wa Gatatu, tariki ya 11 Nzeri 2024, Perezida Paul Kagame yakoze impinduka mu bayobozi bakuru, aho Twagirayezu Gaspard wari Minisitiri w’Uburezi yakuwe kuri izi nshingano, agirwa Umuyobozi Mukuru w’Urwego rushinzwe Isanzure. Izi mpinduka zemejwe na Minisitiri w’Intebe, Dr Edouard Ngirente, mu itangazo ryaturutse mu biro bye.

Nsengimana Joseph ni we wagizwe Minisitiri w’Uburezi, asimbuye Twagirayezu Gaspard wari kuri uyu mwanya kuva muri Kanama 2023, ubwo yasimburaga Dr Uwamariya Valentine. Twagirayezu yari yahawe izi nshingano nyuma yo kuba Umunyamabanga wa Leta ushinzwe amashuri abanza n’ayisumbuye.

Joseph Nsengimana wari usanzwe ari Umuyobozi w’Ikigo cya Mastercard Foundation gishinzwe guteza imbere uburezi binyuze mu ikoranabuhanga, azanye ubunararibonye butandukanye mu nzego z’ikoranabuhanga no mu burezi, aho mbere y’akazi ke muri Mastercard yakoraga mu kigo cy’ikoranabuhanga cy’Abanyamerika, Intel Corporation.

Mu zindi mpinduka, Nelly Mukazayire yagizwe Umunyamabanga Uhoraho muri Minisiteri ya Siporo, asimbuye Niyonkuru Zéphanie, uheruka kwirukanwa. Mukazayire yinjiye muri izi nshingano nshya nyuma y’imirimo itandukanye yo kuyobora ibigo bitandukanye muri Leta.

Izi mpinduka zigamije gukomeza kunoza imikorere y’inzego zinyuranye zifite uruhare rukomeye mu iterambere ry’igihugu.