Perezida Kagame yavuze ku masasu yarasiwe i Goma, akica Abanyarwanda I Rubavu

Perezida Paul Kagame yasezeranyije kuzagira icyo akora ku bijyanye n’icyemezo Ingabo za Repubulika Iharanira Demokarasi ya Congo ziherutse gufata cyo kurasa ku butaka bw’u Rwanda nyuma yo gutsindwa na M23 mu Mujyi wa Goma, zikica Abanyarwanda bamwe, abandi bagakomereka.

Mu ntangiriro z’iki cyumweru ubwo habaga urugamba rwo kubohoza Umujyi wa Goma, abasirikare ba RDC batsinzwe ndetse n’imitwe bafatanyije, bafashe icyemezo cyo kurasa ku butaka bw’u Rwanda, mu Karere ka Rubavu.

Kugeza ku wa 28 Mutarama 2025, ibi bikorwa byari bimaze kugwamo Abanyarwanda icyenda, mu gihe abandi benshi bakomeretse.

Iyi myitwarire y’Ingabo za FARDC ni imwe mu ngingo zagarutsweho na Perezida Paul Kagame mu nama yamuhuje na bagenzi bayobora Ibihugu byo mu Muryango wa Afurika y’Iburasirazuba.

Iyi nama yari mu murongo wo kurebera hamwe icyakorwa ku ntambara ikomeje kuyogoza Uburasirazuba bwa RDC, ndetse n’ikibazo cya M23 gisa n’ikirengagijwe, kikaba gishakirwa ibisubizo bya gisirikare hakwiriye ibya politiki.

Perezida Kagame yabwiye bagenzi be ko hari Abanyarwanda benshi bahitanywe n’aya masasu yavuye i Goma, ndetse asezeranya ko hari icyo azabikoraho.

Ati “Mu minsi ibiri cyangwa itatu ishize twapfushije abantu, habayeho kurasa cyane guturutse mu Burasirazuba bwa Congo, i Goma. Hapfuye abantu babarirwa mu binyacumi, hakomereka abarirwa mu majana, ibyo mu buryo budashidikanywaho tuzabyitaho. Nta kubishidikanyaho.”

Mbere yo kugera kuri iyi ngingo, Perezida Kagame yari yabanje kugaragaza ko uburyo ibihugu by’amahanga biri kwitwara muri iki kibazo bubabaje.

Yatunze agatoki ibihugu nka Afurika y’Epfo bikomeje gukoreshwa na Perezida Félix Antoine Tshisekedi wa RDC muri iyi ntambara.

Ati “Mu minsi ibiri ishize, ku wa Mbere n’uyu munsi mu gitondo [ku wa Gatatu] naganiriye na Perezida wa Afurika y’Epfo wanshatse ngo tuganire kuri iki kibazo kubera uruhare bafite mu Burasirazuba bwa Congo, ari hariya yigira nk’umuntu uri gukora inshingano zo kubungabunga amahoro kandi afite ingabo zirwana zifatanyije na FDLR, ndetse arwana na M23 ku mategeko Tshisekedi kubera ko avuga ‘ko aba ari abantu badakwiriye kuba bari muri Congo, ngo baturuka mu Rwanda’.”

Perezida Kagame yashimangiye ko M23 atari Abanyarwanda, ndetse agaragaza ko mu bihe bitandukanye Tshisekedi ubwe yagiye yemera ko ari Abanye-Congo.

Ati “M23 ntabwo ari Abanyarwanda, aba ni Abanye-Congo ndetse igihe kimwe arabyemera ubundi ikindi gihe akavuga ngo ‘murabona ku gice kimwe ni yego (ni Abanyecongo) ariko ikindi gice gikomoka mu Rwanda.’”

Yakomeje agaragaza ko atumva uburyo abayobozi b’ibihugu bemera gukoreshwa muri ubu buryo.

Ati “Ni gute abayobozi b’ibihugu byacu twemera ko ibi bikomeza kuba iteka ryose ndetse tukemera ko dukwiriye gukoreshwa na Tshisekedi cyangwa undi uwo ari we wese umushyigikiye.”

Ku wa Gatatu tariki 29 Mutarama 2025, Minisitiri w’Ingabo wa Afurika y’Epfo, Angie Motshekga, yatangaje ko Perezida Cyril Ramaphosa, yaganiriye na Perezida Kagame, amuburira ko Ingabo z’u Rwanda nizikomeza kurwanya Ingabo za Afurika y’Epfo mu Burasirazuba bwa Congo, bizafatwa nko gutangiza intambara.

Ni ingingo nayo Perezida Kagame yagize icyo avugaho muri iyi nama y’abayobozi ba EAC.

Ati “Ndetse Afurika y’Epfo ikanatinyuka gutera ubwoba ku bishobora kuba nyuma y’ibyo, birumvikana dutegereje kubona ibyo bikangisho byabo.”

Perezida Kagame yavuze ko ibi Afurika y’Epfo ikangisha yagakwiye kuba yarabikoresheje ikemura ikibazo cy’umutekano muke mu Burasirazuba bwa RDC, cyangwa mu guhangana n’abo irwana nabo muri iyi ntambara.

Yagaragaje kandi ko uyu munsi hari ikibazo cy’uko usanga ibiganiro bya Nairobi na Luanda byashyizweho mu gukemura ibibazo, nta musaruro bitanga kubera ko ababirimo barushije uburemere impamvu yabyo.

Ati “Ibiganiro bya Nairobi byahindutse ibiganiro bya Uhuru, ibiganiro bya Luanda byabaye nk’aho udashobora kuvuga ikintu kidashimisha Perezida Lourenço, ibi ntacyo bifasha mu guhangana n’ibibazo bikomeye nk’iki duhanganye nacyo uyu munsi. Kubera ko bidashobora gukemurwa birangira dufite ibibazo nk’ibihari aka kanya.”

Perezida Kagame yashimangiye ko atumva uko Tshisekedi akomeje gutsimbarara ku ntambara kandi bimaze kugaragara ko nta musaruro itanga.

Ati “Ntabwo numva uko Tshisekedi akomeza gutekereza ko azakemura ibibazo bifite aho bihuriye n’uburenganzira bw’abantu, akoresheje igisirikare, abica, abarasa azana ingabo ziteguye gufasha nk’iz’u Burundi by’umwihariko, ntabwo nzi niba ibyo byarafashije mu minsi mike cyangwa ibyumweru bishize bakora ibyo.”

Yavuze ko “Ndashaka ko buri kimwe turi kuvuga cyangwa icyo duteganya gukora icyo ari cyo cyose, tubanze twumve neza ibiri kuba mu buryo buzima, ubundi dushingiye kuri ibyo dukomeze, wenda dushobora kugira aho tugera. Ariko nidukomeza ibi bintu byo kuratana ibyiza kuri buri umwe no kuba abantu bigira beza ariko bikarangira buri wese aharanira inyungu ze, aho guharanira inyungu duhuriyeho nk’abantu bo muri Afurika y’Iburasirazuba, ntabwo mbona uko tuzatanga umusanzu ufatika mu gushaka igisubizo.”

Perezida Kagame atangaje ibi mu gihe Leta ya RDC yakomeje gushimangira ko itazigera igirana ibiganiro na M23. Ni ibintu byatumye uyu mutwe wubura imirwano, ndetse wigarurira ibindi bice byinshi birimo n’Umujyi wa Goma, uheruka gufata.