Perezida Kagame yanenze EAC ku kibazo cya RDC na M23

“Sinumva ukuntu Tshisekedi akomeza gutekereza ko azakemura ibibazo birebana n’uburenganzira bw’abantu mu buryo bwa gisirikare… abica, abarasa, azana ingabo ziteguye kumufasha nk’iz’i Burundi, sinzi niba ibyo byarafashije mu byumweru bishize bagerageza kubikora.”

Ayo ni amwe mu magambo Perezida wa Repubulika y’u Rwanda Paul Kagame, yanenze uburyarya, kubeshya no kurebera bikomeje kuranga amahanga arimo n’ibihugu bigize Umuryango w’Afurika y’Iburasirazuba (EAC) biteshwa agaciro, hagira ikiba bakigira nk’abatunguwe.

Perezida Kagame yabigarutseho ku mugoroba wo ku wa Gatatu tariki ya 29 Mutarama, mu ijambo yagejeje ku Bakuru b’Ibihugu na Guverinoma bitabiriye Inama idasanzwe y’Abakuru b’Ibihugu na Guverinoma ba EAC.

Iyo nama yabereye ku ikoranabuhanga, yayobowe na Perezida wa Kenya William Samoei Ruto mu bushobozi bwe nk’Umuyobozi Mukuru wa EAC.

Iyo nama yibanze ku bibazo by’umutekano muke mu Burasirazuba bwa RDC, yateranye nyuma y’iminsi mike inyeshyamba za M23 zifashe ibice bitandukanye birimo n’Umujyi wa Goma ufatwa nk’Umurwa Mukuru w’Intara ya Kivu y’Amajyaruguru.

Ikibazo cy’umutekano muke muri iyo ntara kigera ku Rwanda mu buryo butaziguye, haba ku bisasu biterwa ku butaka bw’u Rwanda mu buryo bugambiriwe no kuba izingiro ry’ibyo byose ari umutwe w’iterabwoba wa FDLR ukorana n’ingabo za Leta.

Mu mirwano yabaye ku wa Mbere no ku wa Kabiri i Goma, ingabo za Leta ya Congo (FARDC) zifatanyije na FDLR zaroshye ibisasu ku butaka bw’u Rwanda bihitana abantu 13 bikomeretsa abandi benshi.

Perezida Kagame yavuze ko mu gihe abayobozi ba EAC basobanura neza imiterere y’ibibazo biri muri RDC nka kimwe mu bihugu biri mu Muryango, ibikorwa biherekeza amagambo ngo byarabuze.

By’umwihariko, yavuze ko inzira z’amahoro zashyizweho ku rwego rw’Akarere zabuze kiyobora kandi ari zo zigize ibuye ry’ifatizo ryo gushakira umuti urambye iw’ibibazo bihari.

Aha ni ho yahereye abaza Abakuru b’Ibihugu ati: “Hano hari umuntu muri twe utarigeze abona ko bizaba? Njye narabibonaga kubera ko sinigeze mbona uwafashe inshingano zo kuyobora inzira y’ibiganiro, uwashakaga kumva cyangwa uwageragezaga gutanga icyerekezo icyo ari cyo cyose ku byo twakabaye dukora tuva hamwe tugana ahandi.”

Perezida Kagame yakomeje anenga uburyo inama yiga kuri RDC idafite uyihagarariye, agaragaza ko icyari igihamya simusiga cy’uko ibintu bizakomeza kugorana.

Ati: “Igihugu kiri muri EAC… Ariko simpamya ko ibyo tuganira hari umusaruro byatanga ku bizaba mu rugendo rwo gushaka igisubizo muri kiriya gihugu.”

Perezida Kagame yagaragaje uburyo Tshisekedi yabeshye abandi bayobozi maze ibiganiro by’amahoro byari bigeze kure bigahita bihagarara, harimo n’ibisubizo byumvikana byari byahanzwe ku rwego rwa EAC.

Muri ibyo bisubizo harimo ingabo za EAC zashyiriweho kugarura amahoro mu Karere (EACRF) zikoherezwa mu kwezi k’Ugushyingo 2022, ariko zaba zikomeje akazi kazo Perezida Tshisekedi akazirukana azana n’abandi bagombaga kongera ibibazo barimo abacanshuro, ingabo z’u Burundi, iza SADC…

Uretse n’ibyo, Tshisekedi yahisemo gukorana n’umutwe w’iterabwoba wa FDLR wagejeje muri Congo ingengabitekerezo ya Jenoside n’ivanguramoko byagejeje u Rwanda kuri Jenoside yakorewe Abatutsi mu 1994.

Izo ngabo z’amahanga zose Tshisekedi yazisabye kurwanya M23, umutwe witwaje intwaro w’Abanyekongo uharanira uburenganzira bw’abamaze imyaka irenga 20 batotezwa bahorwa uko bavutse.

Perezida Kagame yakomeje agira ati: “Tshisekedi yumvaga ko tutakoraga ibyo yashakaga, ajya muri SADC imwemerera kuza gukora ibyo yashakaga, maze yirukana abandi bose. Noneho twe ibyo twarabyemeye maze turaceceka, none se ni ibihe bindi twumvaga bizavamo?

Ariko kwirukana Ingabo za EAC muri Congo twese akabyemera, maze tugaceceka nk’aho byari ibintu bisanzwe kandi ibyo byose bitegetswe n’umuntu turimo kugerageza gufasha, sinigeze mbyumva, kandi ni yo mpamvu turi aho turi uyu munsi.”

Perezida Kagame yasabye abayobozi ba EAC gukoresha inyurabwenge ku bibazo biri mu Burasirazuba bwa RDC cyangwa se bagakomeza kubeshywa na Tshisekedi ubashishikariza kwita ku nyungu ze zibangamira abaturage be n’Akarere kose.

Ati: “Nubwo twaba turimo gukora ibintu byose neza, twese hano, nta kintu bizatanga kugeza igihe abarebwa n’ikibazo by’umwihariko bazaba babigize ibyabo, maze bakitabira kandi bakagira uruhare mu guharanira intsinzi y’ibiganiro barimo gufashwamo.”

Yavuze ko ibisubizo by’ibibazo by’umutekano muke bidashobora kuba ibya gisirikare, ahubwo byava mu biganiro nubwo na byo bidahagije mu gihe hadahangwa amaso ku musaruro byitezweho gutanga.

Yongeyeho ati: “Nifuza ko, ibyo twavuga byose cyangwa ibyo duteganya gukora, twafata ukuri kw’ikibazo gihari maze akaba ari aho dukomereza, bityo tuzagira aho tugera. Ariko nidukomeza kubwirana amagambo meza, tukabanirana neza turyama ku nyungu zacu aho kureba iz’abaturage b’Afurika y’Iburasirazuba, simbona uko tuzatanga umusanzu wacu mu gushaka igisubizo kiboneye.”

M23 nk’umutwe washibutse mu miryango yahuye n’akarengane imyaka irenga 20 ishize yose, ukomeje guhindura amateka kugira ngo Abanyekongo bose babone uburenganzira bungana ku gihugu cyabo.

Perezida Kagame yavuze ko ibisubizo bya Leta ya Congo bikomeza gutera ubuhunzi, kwimakaza ubwicanyi bw’abasivili, akarengane n’itotezwa rishingiye ku moko n’ibindi.

Ati: “Dufite impunzi bamaze imyaka irenga 20 hano, birukanywe muri Congo boherezwa mu Rwanda kubera ko babita Abatutsi, bityo ngo ibyo bibagira Abanyarwanda, kandi si iwabo. Dufite MONUSCO, Ingabo za SADC (SAMIDRC), dufite abacanshuro, dufite u Burundi, dufite FDLR yabiyunzeho, noneho buri wese ararebera ibi bintu maze tukigira nk’aho tudasobamukiwe ibimaze iyi myaka yose bikorwa?

Maze haba ibintu nk’ibyo mu cyumweru gishize tukigira nk’aho dutunguwe, dutewe inkeke n’ibibazo byo kubura ubutabazi ku baturage. Ubwo se gutoteza no kwica abantu cyangwa kubatera ubuuhunzi si kimwe mu bibazo biteje inkenke bikeneye ubutabazi? None se muri Afurika Iburasirazuba turicara hano maze tukabikoraho iki?”

Ku rundi ruhande, bamwe mu baturage bari bahungiye mu Rwanda kubera imirwano yari yafashe intera i Goma batangiye gusubira mu byabo nyuma y’amasaha make umutekank wongeye kugaruka.

Ku wa Gatatu abantu 100 mu barenga 1200 bahunze baturutse i Goma baratahutse, mu gihe inyeshyamba za 23 zongeyw kugarura ituze mu Mujyi wa Goma.

Gusa mu bihugu byo mu Kareee ndetse no hanze yako habarurwa abaturage ibihumbi amagana biganjemo abo mu bwoko bw’Abatutsi bahejejwe ishyanga bitwa Abanyarwanda badafite uburenganzira kuri Congo.

Ni kenshi Guverinoma y’u Rwanda yasabye iya Connfo koroherwza abasaga 100,000 bahungiye mu gihugu bagasubira mu byabo ariko bikaba nko guta inyuma ya Huye.