Perezida Kagame yakosoye Perezida w’Afurika y’Epfo Ramaphosa wise RDF inyeshyamba

Perezida wa Repubulika Paul Kagame yabeshyuje Perezida w’Afurika y’Epfo Cyril Ramaphosa, anagaragaza ibyo bibanzeho mu biganiro bibiri bagiranye muri iki cyumweru myuma y’urupfu rw’abasirikare 13 b’Afurika y’Epfo baguye mu mirwano yo mu Burasirazuba bwa Repubulika Iharanira Demokarasi ya Congo (RDC).

Umukuru w’Igihugu, ashingiye butumwa Perezida Ranaphosa yanyujije mu mbuga nkoranyambaga yunamira abo basirikare, yamunyomoje amwibutsa aho yabeshye harimo n’aho yavuze ko Ingabo z’u Rwanda (RDF) ari umutwe witwaje intwaro.

Perezida Kagame yavuze ko ibyavuzwe n’ibitabgazamakuru byo muri Afurika y’Epfo ku biganiro bagiranye, bihabanye n’ukuri kw’ibyo baganiriye, byuzuye ubushotoranyi ndetse n’ibinyoma byambaye ubusa.

Ati: “Niba amagambo ashobora guhinduka bene aka kageni akava ku biganiro akaba imbwirwaruhame, bivuze byinshi ku buryo ibi bibazo bikomeye birimo gukemurwa.”

Aha ni ho Perezida Kagame yahereye akosora iyo mbwirwaruhame yakozwe na Perezida Ramaphosa aho yise RDF inyeshyamba.

Perezida Kagame yagize ati: “Icya mbere, Ingabo z’u Rwanda (RDF) ni ingabo z’Igihugu, si umutwe witwaje intwaro. Icya kabiri SAMIDRC si ingabo ziharanira amahoro, kandi nta mwanya zifite muri iki kibazo.”

Perezida Kagame yasobanuye ko izo ngabo za SAMIDRC zoherejwe n’Umuryango w’Ubukungu w’Ibihugu by’Afurika y’Amajyepfo (SADC) ngo zifashe Guverinoma ya RDC mu mirwano ihanganyemo n’abaturage bayo ifatanyije n’imitwe yitwaje intwaro irimo iy’abajenosideri nka FDLR yubasira u Rwanda imana inategura kurutera igahirika ubutegetsi.

Indi ngingo ya gatatu Perezida Kagame yagarutseho, ni uko abasirikare ba SAMIDRC babanje kwirukanw ingabo zoherejwe n’Umuryango w’Afurika y’Iburasirazuba (EACRF) mu butumwa bw’amahoro, bigakoma mu nkokora inzira y’ibiganiro byari birimbanyije.

Perezida Kagame yakomeje agira ati: “Icya kane, Perezida Ramaphosa ntiyigeze atanga impuruza y’uburyo ubwo ari bwo bwose, keretse niba yarayivuze mu rurimi rw’iwabo ntabasha kumva. Icyo yasabye ni inkunga mu guharanira ko ingabo z’Afurika y’Epfo zibona amashanyarazi ahagije, ibyo kurya n’amazi, tukazamufasha kubigeza aho bikwiye.”

Yongeyeho ati: “Icya gatanu, Perezida Ramaphosa yampamirije ko M23 atari yo yishe abasirikare baturutse muri Afurika y’Epfo, ahubo ingabo za FARDC ari zo zabikoze.”

Yavuze ko niba Afurika y’Epfo ishaka gutanga umusanzu mu gushaka ibisubizo by’amahoro ari byiza cyane, ariko ngo ikwiye kuzirikana ko itari mu mwanya wo gufata inshingano zo kubungabunga amahoro cyangwa kuba umuhuza.

Perezida Kagame yaboneyeho kuvuga ko niba Afurika y’Epfo ikeneye intambara kubera ubushotoranyi bwayo, u Rwanda rwiteguye guhangana n’icyo kibazo isaha n’isaha.

Abasirikare b’Afurika y’Epfo baguye mu mirwano ihanganishije umutwe wa M23 n’ingabo za FARDC zifatanyije na FDLR, Wazalendo n’abacanshuro, mu bihe bitandukanye uhereye mu cyumweru gishize.

Impuguke mu bya Politiki bakomeje kwibaza ukuntu Igihugu nk’Afurika y’Epfo cyagiye kwijandika mu ntambara ihuje abanyagihugu, gihanganye n’uruhare rurwanira uburenganzira bw’abaturage bakamdamijwe igihe kinini.

Perezida Ramaphosa we asobanura ko abasirikare b’Afurika y’Epfo uko ari 13 boherejwe kimwe n’abandi basirikare ba SADC barimo aba Tanzania na Malawi.