Nyuma yaho M23 ifashe Kanyabayonga na Kirumba Perezida Tshisekedi yavuze ikigiye gukurikiraho

Perezida Félix Antoine Tshisekedi yongeye kwikoma “umuturanyi” nyuma y’uko inyeshyamba za M23 zari zimaze kwigarurira imijyi ya Kanyabayonga na Kirumba, atanga isezerano ryo gukora ibishoboka byose kugira ngo yisubize uduce izo nyeshyamba zigaruriye.

M23 yinjiye muri Kanyabayonga ku wa Gatanu w’icyumweru gishize, nyuma y’amasaha make yigarurira undi mujyi wa Kirumba. Ni imijyi yombi yo muri Teritwari ya Lubero mu ntara ya Kivu y’Amajyaruguru.

Tshisekedi mu ijambo yagejeje ku banye-Congo rijyanye n’imyaka 64 RDC imaze ibonye ubwigenge, yashinje abo yise abanzi baturutse hanze bagatera igihugu cye “bitwaje impamvu zitagira ishingiro z’uko hari amabi akorerwa abanyagihugu bavuga ururimi rw’ikinyarwanda”.

Yunzemo ati: “Impamvu zishyirwa imbere n’abaduteye basanzwe bazwi nta shingiro na ntoya zifite. Ibirimo bibera i Kanyabayonga, i Kayini, mu bice byo mu bumanjyepfo ya Lubero no mu bice bya Rutshuru, Nyiragongo na Masisi, ni igitero cyeruye ku bwigenge bwacu”.

Bitandukanye n’ubusanzwe, Tshisekedi mu ijambo rye yirinze kuvuga mu kanwa ke izina u Rwanda, igihugu amaze igihe ashinja kuba ari cyo cyateye igihugu cye.

Nyuma y’amasaha make Kanyabayonga ifashwe, Tshisekedi yatumije inama nkuru ya gisirikare y’ikitaraganya yarimo abasirikare bakuru barangajwe imbere n’Umugaba Mukuru w’Ingabo za RDC, Gen Christian Tshiwewe Songesa.

Umuvugizi wa Guverinoma ya RDC, Patrick Muyaya, nyuma y’iyi nama yavuze ko hari ingamba Tshisekedi yagejejweho nk’izafasha RDC “kwisubiza uduce twigaruriwe n’Ingabo z’u Rwanda”.

Kuri ubu amakuru avuga ko nyuma ya Kanyabayonga na Kirumba M23 ifite gahunda yo kwigarurira Umujyi w’ubucuruzi wa Butembo.

Perezida Tshisekedi mu ijambo rye ku banye-Congo, yijeje abaturage be ko yiteguye gukora ibishoboka byose kugira ngo igihugu gisubirane amahoro n’umutekano.

Ati: “Njye nk’Umugaba w’Ikirenga w’Ingabo na Polisi y’Igihugu, mbijeje ko ntazacogora kurwanira ubutaka bw’igihugu cyacu no kugarukana amahoro”.

Yunzemo ati: “Kuri benewacu na bashiki bacu b’i Kanyabayonga no mu turere two mu nkengero zaho, nifayanyije namwe mu magorwa murimo… mbijeje ko ndimo ndakora ibishoboka byose kugira ngo ngarure umutekano nongere ndinde abanyagihugu bacu bose”.

Tshisekedi yijeje abanye-Congo ko agiye gukora ibishoboka byose, mu gihe bamushinja kuba mu myaka ibiri n’igice ishize ntacyo yakoze ngo yirukane M23 mu duce igenzura.

Ni mu gihe yashoye za miliyari z’amadorali agura intwaro zigezweho, indege z’intambara, imodoka ndetse na za drones.

Ni Tshisekedi kandi witabaje Ingabo z’ibihugu nk’u Burundi, iza SADC, abacanshuro ndetse n’imitwe y’inyeshyamba gusa kuri ubu M23 ikaba ikomeje kumukubita ahababaza.

Mu byo uyu mugabo kandi yishyuzwa n’abanye-Congo harimo isezerano yabahaye ry’uko azashoza intambara ku Rwanda gusa bikarangira abatengushye.