Nyanza: Umugore afunzwe na RIB akurikiranyweho kwica umugabo we amutemesheje umuhoro ubwo yari agiye kumucyura mu rugo yari yarahukaniyemo

Byukusenge Nyiramana Aline, umugore w’imyaka 24 y’amavuko wo mu Karere ka Nyanza, yatawe muri yombi n’Urwego rw’Igihugu rw’Ubugenzacyaha (RIB) akurikiranyweho icyaha cyo kwica umugabo we, Ndagijimana Jacques, w’imyaka 25.

Ibi byabaye ku wa 30 Nyakanga 2024 mu murenge wa Mukingo, akagari ka Cyerezo, mu mudugudu wa Kamabuye.

Amakuru avuga ko Ndagijimana yaje gucyura umugore we wari wahungiye mu rugo rw’umugabo witwa Karangwa Cassien kubera amakimbirane yo mu muryango.

Mu gihe yari ahageze, yaje gutemwa n’umuhoro bikamuviramo urupfu. Abakekwa ku ruhare muri ubu bwicanyi barimo Byukusenge, Icyimpaye Nyirahabimana, na Harerimana Jean D’Amour.

Nyakwigendera yajyanywe mu bitaro bya Nyanza kugira ngo hakorwe isuzuma ry’umurambo. Umunyamabanga Nshingwabikorwa w’Akagari ka Cyerezo, Ntakirutimana Abdou, yatangaje ko akomeje gukurikirana iki kibazo, ariko yanze gutanga amakuru arambuye. Amakuru avuga ko abakekwa bafungiye kuri sitasiyo ya RIB ya Busasamana mu karere ka Nyanza.