Nyamasheke: Yatawe muri yombi akekwaho gutwika hegitari 15 za Nyungwe

Umukandara wa Pariki y’Igihugu ya Nyungwe mu gice cy’Imidugudu ya Karambo na Gituntu, mu Kagari ka Rugali, Umurenge wa Cyato, Akarere ka Nyamasheke, waherukaga gufatwa n’inkongi y’umuriro yahitanye hegitari zigera kuri 15. Iyi nkongi yabaye ku Cyumweru tariki ya 15 Nzeri, gusa umuriro wabashije kuzimwa ku wa Mbere tariki 16 Nzeri.

Abaturage bahurijwe hamwe ngo bafatanye n’inzego z’umutekano mu kuzimya iyi nkongi, ariko bakaza gufatiramo umugabo bakekaga ko ari we watwitse iyi pariki. Uwo mugabo yafatiwe mu bikorwa byo kuzimya, ashinjwa gushimuta inyamaswa no gutwika kugira ngo abone uburyo bwo kubaka imitego no kugurisha inyama z’inyamaswa z’ishyamba.

Inkuru y’iyi nkongi yamenyekanye ku Cyumweru mu ma saa tatu z’igitondo, bikekwa ko umuriro wari watangiye mbere, abaturage bahuruzwa batangira kuzimya ariko ntibashobora kuwuzimya uwo munsi.

Ku wa Mbere nibwo wabashije kuzima neza ariko byabaye ngombwa ko abarinzi ba pariki baguma mu gace kabaga karahiye, kugira ngo bacunge ko nta handi umuriro uciye.

Umunyamabanga Nshingwabikorwa w’Umurenge wa Cyato, yavuze ko mu gihe bari mu gikorwa cyo kuzimya, bahuye n’umugabo basanga afite ibikoresho bikoreshwa mu gushyiraho imitego y’inyamaswa ndetse n’ibindi bimenyetso bishimangira ko ashobora kuba ari umwe mu bashimuta inyamaswa mu mukandara wa pariki. Yagize ati:

“Twamufatiye hagati turi kuzimya tumusangana imitego 18 bategesha inyamaswa, ikibiriti, urumogi rwuzuye urushyi rw’umuntu mukuru n’inkoni 8 bacamo bakazibaza neza bakajya kuzigurisha.”

Uyu mugabo yahise afatwa n’abaturage maze atabwa muri yombi n’inzego z’umutekano, ubu akaba afungiye kuri Sitasiyo ya RIB ya Kanjongo.

Ubushimusi n’ubushorashuri buhererekanwa n’abantu bari inyuma y’ibi bikorwa, ngo ni bimwe mu bituma inkongi z’umuriro zibasira Pariki ya Nyungwe. Abashimusi bashaka inyamaswa n’ubuki baba bateguye cyangwa babaga inyamaswa bazihiga, bigatuma bateza inkongi nk’iyo iherutse.

Harinditwali yavuze ko kugira ngo abaturage bungukire ibyiza bya Nyungwe, ari ingenzi ko bayirinda n’abashaka kuyangiza. Yongeye kwibutsa akamaro iyi Pariki ifitiye abaturage batuye hafi yayo, harimo n’imvura bahabwa, amazi bakoresha, hamwe n’ibikorwa remezo byubakwa n’inkunga ituruka kuri pariki.

Mu gice cya Nyungwe nyir’izina, cyegereye Umurenge wa Ruharambuga mu Kagari ka Wimana, inkongi yahashe hegitari n’igice ku wa 15 Nzeri. Abaturage, ubuyobozi n’inzego z’umutekano bihutiye gukumira ikwirakwira ry’uyu muriro.

Ubuyobozi burasaba abaturage kongera gushyira ingufu mu kubungabunga Pariki y’Igihugu ya Nyungwe, nk’uko Harinditwali abivuga, “Gukomeza kuyicungira umutekano bizatuma abakikije iyi Pariki bakomeza kungukira ku byiza biyikomokaho.” Inama irakomeje gutangwa ku baturage ngo bakumire ibindi bikorwa bishobora gushyira pariki mu kaga, harimo gutangira amakuru hakiri kare igihe babonye umuntu ushatse kuyihungabanya.