Nyamasheke: Uwari Umuyobozi ukomeye mu karere yirukanywe

Ubuyobozi bw’Akarere ka Nyamasheke bwatangaje ko bwirukanye Ndanga Janvier wari Umuyobozi w’Ishami ry’Iterambere ry’Imibereho Myiza mu karere, kubera guhoza ku nkenke umukozi akuriye.

Meya w’Akarere ka Nyamasheke, Mupenzi Narcisse, yemeje ko Ndanga Janvier yirukanywe ku mirimo ye tariki ya 23 Nyakanga 2024. Icyemezo cyo kumwirukana cyafashwe nyuma y’iperereza ryakozwe n’akanama gashinzwe gukurikirana imyitwarire mbonezamurimo, kakamuhamya ikosa rihanishwa kwirukanwa.

Meya Mupenzi yagize ati: “Iyo myitwarire n’imigirire akanama gashinzwe gukurikirana amakosa, kayibona nk’igize ikosa ry’imyitwarire kandi iyo myitwarire ikaba inyuranye n’imyitwarire mbonezamurimo. Niyo mpamvu akanama gashinzwe gukurikirana imyitwarire mbonezamurimo kabikurikiranye, kakora iperereza, gasanga koko ahamwa n’ikosa rimushyira mu rwego rw’amakosa ahanishwa igihano cyo kwirukanwa.”

Amakuru avuga ko Ndanga Janvier yakoreye umukozi ihohoterwa rishingiye ku gitsina, ndetse bikajya mu manza urukiko rumugira umwere. Nyuma y’icyo kibazo, ubuyobozi bw’akarere bwashyize ibyuma bifata amashusho mu biro by’Akarere kugira ngo hirindwe amakosa nk’ayo yasubira.

Meya Mupenzi yasabye abakozi kugira imyitwarire mbonezabupfura, avuga ko buri mukozi akwiye kwitwararika aho ari hose kugira ngo imyitwarire n’imigirire bye bitaza kubashyira mu makosa yatuma bahanwa.

Uwahoze ari umukozi wa Leta wirukanywe, agashyirwa ku rutonde rw’abatemerewe kwaka akazi muri Leta, ashaka gusubira mu kazi ka Leta yandika asaba ihanagurabusembwa amaze nibura imyaka itanu ibarwa uhereye igihe yirukaniwe mu bakozi ba Leta.