NYAMAGABE: Abaturage twahanye igihango gikomeye” Dr Habineza Frank”

Kuri iki cyumweru tariki ya 7 Nyakanga 2024, Mu murenge wa Gasaka akarere ka Nyamagabe Ishyaka riharanira Demokarasi no kurengera ibidukikije DGPR,  riratangaza ko ryahanye igihango n’abaturage b’akarere kuko mu bibazo bajyanye mu nteko 70% byarakemutse naho ibindi bakurikiranye nyuma 50% byagezweho.

Hon Dr Habineza yagarutse kubyo bakoze birimo ibibazo bajyanye mu nteko uko byakemutse ndetse ababwira ko ubwe yitereye ibiti muri aka KARERE Kandi ko bihari bikaba byarakuze.

Yakomeje avuga ko nibaramuka babagiriye icyizere bitarenze ukwezi kwa 9 amaze gutorwa azahita akuraho ibigo bya Transit Center, yongera umushahara wa mwarimu wa kaminuza.

Nanone Kandi bazanoza imirire y’abana ku ishuri babahe indyo yuzuye, Kandi ihagije kuri bose ndetse no kuvugurura Aho abana barira.

Mu bindi bibazo byagaragaye I Nyamagabe nk’uko byagaragajwe na Chairman w’iri shyaka mu ntara y’ Amajyepfo Innocent Iyakaremye harimo ikibazo cy’abantu bafungwa iminsi 30 y’agateganyo.

Hon Dr Habineza Frank yavuze ko nibabagirira icyizere iki gifungo kizakurwaho burundu ndetse abafungiwe ubusa muri iyi minsi 30 bahabwe indishyi z’akababaro binyuze mu ikigega cyizashyirwaho aribyo kigamije.

Yabwiye abaturage ba Nyamagabe ko nibabagirira icyizere bazabafasha kubona imihanda 2 y’ingenzi irimo umuhanda wa Kaduha ndetse n’uwa Nyamagabe Nyaruguru.

Ku birebana n’ubukerarugendo yavuze ko nibatorwa bazanozwa ibijyanye n’ubukerarugendo ku buryo ba Mukerarugendo bazajya baza muri aka KARERE bakahatinda.