Nyagatare: Abantu 40 hafashwe bazira kwiba amatungo

Mu mezi abiri ashize, ubufatanye hagati y’inzego z’umutekano n’abaturage mu Karere ka Nyagatare bwatanze umusaruro ukomeye mu guhashya ubujura bw’amatungo, aho hafashwe abajura barenga 40.

Abaturage bitabira amarondo kandi batanga amakuru ku gihe ku bakekwaho ubu bujura, bituma abafashwe bashyikirizwa ubutabera.

Bernard Nyinganyiki, umwe mu baturage bo muri Nyagatare, yavuze ko ushinzwe umutekano n’abaturage bafashije mu gufata abajura b’ibikoresho by’amatungo, nko gufata abibye ihene n’inka. Ubu buryo bufasha kwirinda ubujura no gusubiza inyuma ibikorwa by’abagizi ba nabi.

Karusi Steven, umwe mu bibwe inka, yavuze ko kwibwa amatungo ari ikibazo gikomeye, kuko bisubiza inyuma ibikorwa byo kwiteza imbere.

Ati: “Kwibwa inka ni ugucibwa inkokora.” Yavuze ko bamaze kubona aho ibikoresho byabo byari byashizwe nyuma yo kwibwa, byatumye bashyikiriza amakuru ajyanye n’iby’ubujura, maze inzego z’umutekano zifatamo ingamba.

Musonera Gadi nawe yavuze uko bafashwe n’amarondo, aho amwe mu matungo yari yibwe yasubijwe.

Abaturage bagaragaje ko abajura baba bafitanye imikoranire n’abacuruzi b’inyama z’amatungo yibwe, aho imwe mu nzira zo gufata abagizi ba nabi ari ukwimakaza amarondo adasanzwe no gutanga amakuru ku nzego zibishinzwe.

ACP Boniface Rutikanga, Umuvugizi wa Polisi y’u Rwanda, yagaragaje ko ubu hamaze gufatwa abasaga 40 mu gihe gito, ashimangira ko uzafatwa wese azaryozwa ibikorwa bye mu buryo bukurikije amategeko. Yibukije kandi ko ubufatanye bw’inzego z’umutekano n’abaturage ari ingenzi mu guhashya ibyaha.

Umuyobozi w’Akarere ka Nyagatare, nawe yashimye amarondo y’umwuga n’ubufatanye bw’inzego z’umutekano mu kugenzura umutekano, aho ba rwiyemezamirimo bagira uruhare mu kwita ku mutekano w’amatungo n’ibindi byangombwa by’ingenzi by’abaturage.

Kugeza ubu mu Karere ka Nyagatare hari amarondo y’umwuga mu duce tugera kuri 50, akomeje gufasha mu gukumira no guhashya ubujura.