Nyabihu: Gitifu w’Umurenge yatawe muri yombi

Urwego rw’Ubugenzacyaha, RIB, rwatangaje ko Mugabekazi Donathile, Umunyamabanga Nshingwabikorwa w’Umurenge wa Jomba mu Karere ka Nyabihu, afunzwe akekwaho icyaha cyo gukubita no kugirira urugomo abashinzwe umutekano mu nzego za leta.

Ibyaha Mugabekazi Akekwaho

Umuvugizi wa RIB, Dr. Murangira B. Thierry, yabwiye IGIHE dukesha iyi nkuru ko Mugabekazi yakoze iki cyaha ku wa 06 Nyakanga 2024, akaba yarafashwe ku wa 10 Nyakanga 2024.

Dr. Murangira yagize ati, “Nibyo. Umunyamabanga Nshingwabikorwa w’Umurenge wa Jomba, Mugabekazi Donathile, yafunzwe ku wa 10 Nyakanga 2024. Akekwaho icyaha cyo gukubita no kugirira urugomo abashinzwe umutekano mu nzego za leta.”

Gufungwa kwa Mugabekazi

Mugabekazi afungiwe kuri Sitasiyo ya RIB ya Mukamira, nk’uko Dr. Murangira yemeje, kandi dosiye ye yamaze gushyikirizwa Ubushinjacyaha.

Imibare ku Byaha byo Gukubita no Gukomeretsa

Mu 2023, raporo y’ibikorwa by’Urwego rw’Ubucamanza yerekanye ko icyaha cyo gukubita no gukomeretsa ari cyo cyiganje mu nkiko z’u Rwanda. Raporo igaragaza ko umwaka ushize w’ubucamanza warangiranye na Kamena 2023 hakiriwe dosiye 18,716, zigize 25% by’ayakurikiranywe, zifite abantu 28,333.

Abakurikiranyweho iki cyaha bayobowe n’urubyiruko rungana na 40.1%, abafite imyaka hagati ya 31 na 40 bagize 31.7%, abafite hagati ya 41 na 50 bagize 16.9%, mu gihe abafite imyaka 51 na 60 bagize 6.3%.

Itegeko ku Gukubita no Gukomeretsa

Itegeko riteganya ko icyaha cyo gukubita no gukomeretsa gihanishwa igifungo kiri hagati y’imyaka itatu n’itanu n’ihazabu y’amafaranga y’u Rwanda atari munsi y’ibihumbi 500 Frw ariko atarenze miliyoni 1 Frw.