Muhanga: Umugabo w’imyaka 44 arakekwaho gusambanya umukobwa we ufite ubumuga bwo kutumva no kutavuga

Mu Karere ka Muhanga, Umurenge wa Mushishiro, haravugwa inkuru y’umugabo w’imyaka 44 ukekwaho gusambanya umukobwa we w’imyaka 24 ufite ubumuga bwo kutumva no kutavuga. Uyu mugabo yashinjwe iki cyaha nyuma y’aho umukobwa we akoresheje amarenga abwira nyina ibyabaye ubwo yari atashye.

Umunyamabanga Nshingwabikorwa w’Umurenge wa Mushishiro, Niyonzima Gustave, yemeje ko aya makuru yabagezeho ku wa 18 Kanama 2024, maze inzego z’ibanze zihita zifata uwo mugabo zikamushyikiriza Urwego rw’Igihugu rw’Ubugenzacyaha (RIB) ishami rya Mushishiro. Hari amakuru avuga ko uyu mugabo ashobora kuba yari asanzwe asambanya uyu mukobwa, ariko ntibimenyekane kubera ubumuga bwe bwo kutavuga.

Itegeko rigena ko gukoresha imibonano mpuzabitsina ku gahato ku muntu bafitanye isano rya hafi (nk’umwana) biganisha ku gihano cy’igifungo cya burundu. Inzego z’ubutabera ziri gukurikirana iki kibazo ngo hamenyekane ukuri ku byabaye.