Mozambique: Abigaragambya bamagana ibyavuye mu matora bahanganye na Polisi

Polisi yo muri Mozambique iherutse guhura n’abigaragambya batavuga rumwe n’ubutegetsi, bari bakoraniye mu Murwa Mukuru wa Maputo, bamagana ibyavuye mu matora ya Perezida w’Igihugu.

Iyi myigaragambyo yaturutse ku rupfu rw’abanyapolitiki babiri bo mu ishyaka ritavuga rumwe n’ubutegetsi, bishwe mu cyumweru gishize.

Polisi yakoresheje imyotsi iryana mu maso n’amasasu mu gutatanya abigaragambya, ndetse abanyamakuru babiri bakomerekejwe bikomeye mu gikorwa cyo guhangana n’abo bigaragambya.

Amatora ya Mozambique yari ahanzwe amaso cyane, cyane cyane ku buryo yatunganyijwe mu mucyo no kwizerwa. Kuva ibyavuye mu matora by’agateganyo byatangazwa, ishyaka riri ku butegetsi, FRELIMO, ryagaragaye nk’iri ku isonga, bikaba byerekana ko Daniel Chapo, usanzwe ari Guverineri muri iri shyaka, afite amahirwe menshi yo gutsinda.

Uyu mukandida Chapo ahanganye na Venâncio Mondlane, wahoze ari mu ishyaka RENAMO ritavuga rumwe n’ubutegetsi ariko aza kwiyamamaza ku giti cye ashyigikiwe n’urubyiruko. RENAMO nayo yatanze Ossufo Momade nk’umukandida wayo.

Abatavuga rumwe n’ubutegetsi baravuga ko amatora yabayemo uburiganya no kwiba amajwi, ndetse indorerezi zaturutse muri Amerika zikaba zaravuze ko adakoreshejwe mu bwisanzure. Amatora yo muri Mozambique yari yitabiriwe n’abaturage basaga miliyoni 17 mu baturage miliyoni 30 batuye iki gihugu, kandi yakozwe akomatanyije n’amatora y’Abadepite n’abayobozi b’Intara.

kugeza ubu, ishyaka riri ku butegetsi ryirinda kugira icyo rivuga ku byavuzwe n’abatavuga rumwe na ryo bijyanye n’uyu matora.