Minisitiri Musabyimana yavuze ko Leta igiye gusubiza ubusabe kuri Kiliziya zafunzwe

Minisitiri w’Ubutegetsi bw’Igihugu, Jean Claude Musabyimana, yatangaje ko Leta y’u Rwanda igiye gusubiza vuba icyifuzo cy’Abakristu cy’uko kiliziya zamaze kuzuza ibisabwa zasubira gufungura. Yabivuze tariki ya 5 Ukwakira 2024, mu birori by’Itangwa ry’Ubwepiskopi bwa Myr Jean Bosco Ntagungira, umwepiskopi mushya wa Diyosezi ya Butare.

Icyifuzo cyo gufungura izi kiliziya cyari cyagejejwe kuri Leta na Myr Jean Marie Vianney Gahizi, Igisonga cy’Umwepiskopi wa Butare, aho yagaragaje ko hari kiliziya zafunzwe ariko zimaze kuzuza ibisabwa. Asubiza iki cyifuzo, Minisitiri Musabyimana yavuze ko Leta yiteguye kugisubiza bidatinze, asaba kandi abakristu gukomeza gufasha Leta mu bikorwa by’iterambere, by’umwihariko mu bufatanye hagati ya Leta n’amadini n’amatorero.

Mu itangazo ry’Inama y’Abepiskopi gatolika ryasohotse nyuma y’Inteko rusange y’Abepiskopi ya 171, byatangajwe ko hari kiliziya 47 za Paruwasi n’izindi 474 za Santarali zafunzwe kubera kutuzuza ibisabwa. Iyi gahunda yo gufunga insengero zatangiye muri Kanama 2024, igamije gufunga inyubako zitujuje ibyangombwa, yibasiye insengero zisaga ibihumbi bitanu hirya no hino mu gihugu.

Abepiskopi bagaragaje ko bibabaje kuba abakristu batabona aho gusengera, basaba kwihangana no gukora ibishoboka byose ngo bubahirize ibisabwa vuba. Bakomeje kandi ibiganiro na Leta mu rwego rwo gushaka igisubizo kirambye, kugirango abakristu babashe kongera gusenga mu buryo bwemewe n’amategeko.

Mu rwego rwo gukomeza kwihutisha ishyirwa mu bikorwa ry’amategeko, akarere kari gafite inshingano zo guhagarika insengero zitujuje ibisabwa zahawe amabwiriza yo kwandikira amakuru ku buziranenge bwazo. Bamwe mu bakristu bamaze kubahiriza ibyo basabwe ndetse banandikiye inzego zibishinzwe kugira ngo basubizwe kiliziya zabo, ariko batarabona igisubizo.

Minisitiri Musabyimana yashimangiye ko ibikorwa by’amadini bikwiye kuba urufunguzo rwo kubaka igihugu no kugirira akamaro abaturage. Yagaragaje ko ubufatanye hagati ya Leta n’amadini buzafasha mu guharanira iterambere rirambye mu baturage no gukomeza kurinda ubuzima n’uburenganzira bw’abantu bose.