MINISANTE yamaze impungenge abantu ku rukingo rwa Marburg

Mu gihe u Rwanda rwatangiye gukingira virus ya Marburg Minisiteri y’Ubuzima, (MINISANTE), yagaragaje ko urukingo rwayo nta ngaruka rutera kuko rwakoreshejwe guhera mu 2018, kandi abakingiwe batapfuye cyangwa ngo barware izindi ndwara.

MINISANTE yatangaje ko inkingo z’icyorezo cya Marburg zageze mu Rwanda mu ijoro ryo ku wa Gatandatu tariki ya 5 Ukwakira 2024, kandi zamaze kugenzurwa n’Ikigo cy’Igihugu cy’Ubuzima (RBC), zigategurwa ngo zitangire zikingirwe.

Umunyamabanga wa Leta muri Minisiteri y’Ubuzima Dr. Yvan Butera, abinyujije ku rukuta rwa ‘X’ kuri uyu wa 07 Nzeri yatangaje ko urukingo rwa virus ya Marburg rutica kandi nta n’izindi ngaruka rutera umubiri ahubwo utangira gukora ubwirinzi mu gihe gito.

Ati: “Urukingo mu 2018 rwatangiye gukoreshwa muri Leta Zunze Ubumwe z’Amerika icyo gihe akaba ari bwo bwa mbere rwari rutangiye gukoreshwa mu bantu. Ariko n’umwaka ushize mu gihugu cya Kenya na Uganda rwarakoreshejwe. Uru rukingo rukaba rwaragaragaje ko nta ngaruka ku buzima rugira, nta zindi ndwara rutera ntabwo rwica kandi rugaragaza ko rurinda iki cyorezo ku rwego rushimishije cyane.”

Dr Butera yagaragaje ko urukingo rwa Marburg rumaze igihe rwarakozwe kandi rwasuzumwe bihagije akaba ari yo mpamvu ruterwa abantu.

Ati: “Uru rukingo rumaze igihe rwarakozwe. Nk’uko mubizi inkingo zica mu nzego zitandukanye kugira ngo zikoreshwe mu bantu hari igice cya mbere aho zibanza zigaca muri za Laboratwari bakareba uko zikora, hanyuma zikagera ku rwego rwo gukoreshwa ku nyamanswa kugira ngo barebe ubushobozi bwazo n’umutekano wazo noneho zikagera ku rwego rw’abantu.”

Yongeyeho ko iki gikorwa cyo guhashya Marburg gitangirira ku bakora mu nzego z’ubuvuzi barimo; abaganga, abaforomo, n’abandi bakora mu kwa muganga bafite ibyago byo guhura n’abanduye.

Minisitiri w’Ubuzima, Dr. Nsanzimana Sabin, yavuze ko nubwo inkingo zaje zitagera ku bantu bose ariko bazakomeza kuzigeza ku bantu benshi bitewe nuko zizagenda ziboneka.