M23 yafashe Umusirikare w’Umurundi ufite ipeti rya Major

Major Claude Ndikumana wo mu Ngabo z’u Burundi yafatiwe mu mirwano yabereye ahitwa Kaziba, muri Kivu y’Amajyepfo, mu birometero 15 hafi ya Nyangezi, hafi y’Umujyi wa Bukavu. Kugeza ubu, igisirikare cy’u Burundi ntacyo kiratangaza kuri aya makuru.

Iyi nkuru yabanje gutangazwa na Dr. Dash ku rubuga rwa X (yahoze ari Twitter), nyuma yemezwa n’abayobozi bo muri Alliance Fleuve Congo (AFC) ifatanya na M23, nubwo batashatse ko amazina yabo ajya ahagaragara.

Major Ndikumana, wari umuyobozi wungirije wa batayo ya 10, bivugwa ko we n’abasirikare be bari kumwe n’inyeshyamba za FDLR ubwo bateye ibirindiro by’umutwe wa AFC/M23 muri Kaziba ku wa Kabiri w’iki cyumweru. Amakuru avuga ko yarashwe akaguru, abasirikare be bakamuta, hanyuma M23 ikamufata.

U Burundi bufite ingabo ziri muri RDC binyuze mu bufatanye n’igisirikare cya Congo (FARDC), ariko ahenshi zari zirinze zatsinzwe n’umutwe wa AFC/M23, zigahindirwa muri Kivu y’Amajyepfo. Nubwo hari ibivugwa ko abasirikare b’u Burundi bafatiwe ku rugamba, iki gihugu ntikiragira icyo gitangaza ku kibazo cya Major Ndikumana.

Umuvugizi w’igisirikare cy’u Burundi yigeze kuvuga ko niba hari abasirikare babo bafashwe, M23/AFC yagombye kubashyikiriza Umuryango Mpuzamahanga wa Croix-Rouge kugira ngo basubizwe iwabo. Gusa, nta cyemezo cyafashwe kuri Major Ndikumana n’igisirikare cye.