Lionel Messi ashobora gusubira gukinira FC Barcelona

Rutahizamu w’Umunya Argentine, Lionel Messi, ashobora kongera kwambara umwambaro wa FC Barcelona nyuma yo kurangiza amasezerano ye muri Inter Miami yo muri Leta Zunze Ubumwe za Amerika.

Amasezerano ya Lionel Messi muri Inter Miami azarangirana n’uyu mwaka w’imikino wa 2025, kandi uyu mukinnyi w’imyaka 37 ntaragira gahunda yo guhagarika gukina ruhago. Amakuru mashya atangwa n’umunyamakuru Alex Candal avuga ko Messi ubwe yamwemereye ko afite intego yo gusubira muri FC Barcelona.

Ati: “Ntabwo nava mu mupira w’amaguru ntakiniye kuri stade nshya ya Camp Nou.”

Lionel Messi yageze muri FC Barcelona akiri umwana muto, aho yayikiniye imyaka myinshi kugeza mu 2021 ubwo yerekeje muri Paris Saint-Germain (PSG) yo mu Bufaransa. Icyo gihe, FC Barcelona yari mu bibazo by’amikoro, bikaba byaratumye itakaza rutahizamu wayo ukomeye.

Messi asezera kuri FC Barcelona

Mu gihe yamaze muri FC Barcelona, Messi yayifashije gutwara ibikombe 34 bikomeye, birimo ibya La Liga 10 na UEFA Champions League 4. Muri iyi kipe, yakinnye imikino 778, atsinda ibitego 672 ndetse anatanga imipira ivamo ibindi bitego 269.

Nyuma yo kudahirwa muri PSG, Messi yahisemo kwerekeza muri Inter Miami mu 2023, aho amaze gutwarana nayo igikombe cya Leagues Cup.

Icyakora, uko imyaka ishira niko ashaka kugaruka aho yatangiriye urugendo rwe rwa ruhago. FC Barcelona iri kuvugurura stade yayo ya Camp Nou, bikaba byitezwe ko Messi ashobora gutegereza ko yuzura kugira ngo azayikiniremo mbere yo gusezera kuri ruhago.

Nubwo nta cyemezo cya nyuma cyatangajwe, abakunzi ba FC Barcelona bari mu byishimo byo kuba bashobora kongera kubona Messi akinira iyi kipe y’amateka.