Kirehe: Ibyumba 11 by’amashuri byasambuwe n’umuyaga

Ku gicamunsi cyo kuri uyu wa Gatandatu, tariki ya 07 Nzeri 2024, imvura ivanze n’umuyaga yibasiye ishuri rya GS Migongo riherereye mu Kagari ka Nyarutunga, Umurenge wa Nyarubuye mu Karere ka Kirehe, igasambura ibyumba by’amashuri 11.

Nzirabatinya Modetse, Umuyobozi wungirije ushinzwe iterambere ry’ubukungu mu Karere ka Kirehe, yatangaje ko ubuyobozi bwahise butangira ibikorwa byo gusana ibi byumba byasambutse.

Yavuze ko ibi bikorwa bigamije kwirinda ko imyigire y’abana yahungabana, ndetse anizeza ko ku wa Mbere tariki ya 9 Nzeri 2024, abana bazatangira amasomo nk’ibisanzwe.

Yagize ati: “Turi gukora ibishoboka ngo ibisenge byasambutse bisanwe mu gihe gito. N’ubwo byagera ku wa Mbere tutararangiza, abana bazakomeza kwiga; bamwe bazajya biga igitondo abandi ikigoroba.”

Yongeyeho ko ubuyobozi bwashyizemo imbaraga nyinshi kugira ngo imirimo yo gusana izarangire vuba, hagamijwe guharanira ko amashuri atakomeza guhagarara.