Kamonyi: Abifashijwemo na nyina umukobwa w’imyaka 24 yabyaye umwana bahita bamwica

Umukobwa witwa Umulisa Anitha w’imyaka 24 y’amavuko, akomeje gushakishwa n’ubuyobozi bw’Umurenge wa Gacurabwenge mu Karere ka Kamonyi, nyuma yo kubyara umwana, abifashijwemo na nyina bakamujugunya mu bwiherero, aho bikanarangira yitabye Imana.

Amakuru avuga ko intandaro yo kujugunya uyu mwana ukivuka mu bwiherero, ari uko uwamuteye inda yamwihakanye. Bamwe mu baturage baturanye n’uyu muryango, bavuga ko kuri uyu wa Gatanu tariki 02 Kanama 2024, batunguwe no kumva ibyabaye ku mwana w’umukobwa wafatanyije na nyina gukuramo inda, bakanica uruhinja rwaje gukurwa mu musarane nyuma y’uko hari hatanzwe amakuru ubuyobozi.

Inkuru dukesha BTN ivuga ko uwo mukobwa witwa Anitha yahise acika inzego z’umutekano, aho kugeza n’ubu agikomeje gushakishwa, mu gihe nyina bikekwa ko bafatanyije kwica uruhinja yamaze gutabwa muri yombi.

Abaturage bavuze ko babajwe no kumva igikorwa nk’iki umubyeyi yafatanyijemo n’umwana we, ndetse bavuze ko bifuza ko mu gihe bahamwe n’icyaha bazazanwa mu ruhame.

Umujyanama w’Ubuzima muri uriya Murenge wa Gacurabwenge yavuze ko bajyaga babaza Anitha niba atwite ndetse bakanamugira inama ko yajya kwipimisha kwa muganga niba koko byarabaye, ariko ngo yarabatukaga akababera ibamba. Umwe mu nshuti ze yemeje ko Anitha yari yaramubwiye ko atwite, gusa yanamubwiye ko umugabo wamuteye inda ntacyo azamufasha ahubwo ngo azabaga akifasha kuko yamwihakanye.